काठमाडौँ । नेपालले आइसिसी टि २० विश्वकप एसिया क्षेत्र छनोटको सेमिफाइनल खेलमा आज युएईसँग खेल्दैछ ।
खेल बिहान ११ बजे मुलपानी क्रिकेट मैदानमा सुरु हुनेछ । नेपाली टिमका समर्थक भने बिहानैदेखि मैदान वरपरका क्षेत्रमा पुगेका छन् ।
नेपाल क्रिकेट सङ्घ (क्यान) ले ३५ सय दर्शकको मात्रै सिट क्षमता भएका कारण घरमै बसेर युट्युब च्यानलमा खेल हेर्न अनुरोध गरेको छ ।
आजको यो खेलमा विजेता टोलीले २०२४ को टि २० विश्वकप खेल्न पाउनेछ ।
नेपाल युएईलाई हराउँदै २०१४ पछि पहिलो पटक टि २० विश्वकप खेल्ने सोचका साथ मैदान उत्रने छ । नेपालको रोहित पौडेल र युएईको मोहम्मद वासिमले कप्तानी गर्नेछन् ।
नेपाल समूह ए को उपविजेता र युएई समूह बी को विजेता बन्दै सेमिफाइनलमा भिड्न लागेका हुन् । आजको अर्को सेमिफाइनल खेलमा टियु क्रिकेट मैदानमा ओमान र बहराइनबीच प्रतिस्पर्धा हुनेछ ।
ओमान समूह ए को विजेता र बहराइन समूह बी को उपविजेता बन्दै सेमिफाइलन खेल्न लागेका हुन् । फाइनल खेल भने पर्सि बिहान ११ बजे टियु क्रिकेट मैदानमा हुनेछ ।
प्रकाशित मिति: शुक्रबार, कात्तिक १७, २०८०, ०९:३५
