काठमाडौँ । सरकारले जाजरकोट र रुकुम पश्चिमका भूकम्प प्रभावितका लागि अस्थायी आवास निर्माण गर्न सुरक्षाकर्मी खटाउने निर्णय गरेको छ ।
बुधबार बसेको मन्त्रिपरिषद् बैठकले भूकम्प प्रभावितका लागि आवास निर्माण गर्न सुरक्षाकर्मी खटाउने निर्णय गरेको सञ्चार तथा सूचना प्रविधिमन्त्री रेखा शर्माले जानकारी दिनुभयो।
‘अस्थायी आवास निर्माणका लागि प्रभावित जिल्लाका प्रमुख जिल्ला अधिकारीको नेतृत्वमा जिल्ला सुरक्षा समिति बनेको हुन्छ, त्यसैको सिफारिसमा नेपाली सेना, सशस्त्र प्रहरी र नेपाल प्रहरीलाई खटाउने निर्णय भएको छ’, उहाँले भन्नुभयो।
मन्त्रिपरिषद् बैठकले जिल्लामा जनशक्ति अपुग भएमा प्रमुख जिल्ला अधिकारीको मागको आधारमा थप जनशक्ति उपलब्ध गराउने निर्णयसमेत गरेको उहाँले जानकारी दिनुभयो ।
कात्तिक १७ गते राति बारेकोटको रामीडाँडालाई केन्द्रविन्दु बनाएर ६ दशमलव ४ म्याग्निच्युडको भूकम्पका कारण जाजरकोट र रुकुम पश्चिममा ६५ हजारभन्दा धेरै परिवार घरवास विहीन भएका छन् । त्रिपालमा बस्न बाध्य भएका भूकम्प प्रभावितलाई चिसोले थप समस्या पारेको छ । भूकम्प पछि त्रिपालमा बसेका मध्ये १५ जना ज्येष्ठ नागरिक र सुत्केरीको मृत्यु भएको छ ।
प्रकाशित मिति: बुधबार, मंसिर १३, २०८०
