काठमाडौँ । आइसीसी लिग टू को त्रिदेशीय क्रिकेट शृंखला आजदेखि काठमाडौँमा सुरू हुँदैछ।
शृंखलामा नेपाल, नामिबिया र नेदरल्यान्ड्स रहेको शृंखलाको पहिलो खेलमा आज नेपाल र नामिबिया खेल्दैछन् । खेल कीर्तिपुरमा बिहान सवा ९ बजे सुरू हुनेछ।
सन् २०२७ को विश्वकप छनोट प्रतियोगिताको रुपमा रहेको लिग टू को पहिलो त्रिकोणात्मक शृंखलाका लागि नेपाल क्रिकेट संघले नेपाली टिममा दुई खेलाडी परिवर्तन गरेको छ।
रोहित पौडेलको कप्तानीमा रहेको नेपालको टोलीमा आसिफ शेख, कुशल भुर्तेल, कुशल मल्ल, आरिफ शेख, पवन सर्राफ, भीम सार्की, दीपेन्द्रसिंह ऐरी, गुल्सन झा, सोमपाल कामी, करण केसी, ललित राजवंशी, सूर्य तामाङ, देव खनाल र अनिलकुमार साह रहनुभएको छ ।
प्रतियोगितामा नेपालले फागुन ५ मा नेदरल्यान्ड्ससँग, फागुन ९ गते नामिबियासँग र फागुन १३ मा नेदरल्यान्ड्ससँग खेल्नेछ ।
गत संस्करणमा सात टिमबीच प्रतिस्पर्धा भएकोमा यसपटकको लिग टू मा आठ टिम छन्। आठ टिमले जम्मा १४४ एकदिवसीय खेल खेल्नेछन् ।
आठ मध्ये शीर्ष चारमा पर्ने टिमको एकदिवसीय मान्यता कायम रहनुका साथै विश्वकप छनोटमा पुग्नेछन्।
बाँकी चार टिमले विश्वकप च्यालेन्ज लिगबाट आउने चार टिमसँग विश्वकप क्वालिफायर प्लेअफ खेल्नेछन्।
लिग टू खेल्ने टिमहरु
क्यानडा
नामिबिया
नेपाल
नेदरल्यान्ड्स
ओमान
स्कटल्यान्ड्स
यूएई
अमेरिका
प्रकाशित मिति: बिहीबार, फागुन ३, २०८०
