काठमाडाैँ । नेपाल त्रिकोणात्मक टी-ट्वान्टी अन्तराष्ट्रिय क्रिकेट शृंखलाको फाइनल प्रवेश गरेको छ । हङ्कङमा मङ्गलबार भएको दोस्रो खेलमा पपुवा न्यूगिनी (पीएनजी)लाई ८५ रनले हराउँदै नेपाल फाइनल पुगेको हो ।
नेपाल र हङकङबिचको पहिलो खेल बर्षाका कारण अवरुद्ध भएपछि दुबै टोलीले अङ्क बाँडेका थिए ।
१ सय ९९ रनको लक्ष्य पाएको पीएनजीलाई नेपालले १७ औं ओभरमा १ सय १७ रनमा अलआउट गर्यो । नेपालका कुशल भुर्तेलले ४ विकेट लिनुभयो । उहाँले ४ ओभरमा मात्र १७ रन खर्चेर ४ विकेट लिनुभएको हो ।
यस्तै प्रतिश जिसीले २ तथा आकाश चन्द र गुलशन झाले १-१ विकेट लिनुभयो ।
टस हारेर पहिले ब्याटिङ गरेको नेपालले २० ओभरमा ६ विकेट गुमाएर १ सय ९८ रन बनाएको थियो । नेपालका कुशल भुर्तेल र सन्दीप जोराले अर्धशतक प्रहार गर्नुभयो । कुशलले ३९ बलमा चार छक्का र चार चाैकाको सहयोगमा ५९ रन बनाउनुभयो ।
यस्तै, सन्दीपले २६ बलमा चार छक्का र तीन चाैकाको मद्दतमा ५६ रन बनाउनुभयो ।
बिनोद भण्डारीले २२ बलमा २ चौका र १ छक्कासहित २७ रन बनाउनुभयो । यस्तै, विवेक यादवले ४ बलमा ३ छक्कासहित नटआउट १९ रन तथा लोकेश बमले ६ बलमा १४ रन बनाउनुभयो ।
प्रकाशित मिति: मंगलबार, फागुन २९, २०८०
