काठमाडौँ । नेपाली राष्ट्रिय पुरुष क्रिकेट टोलीका प्रशिक्षक मोन्टी देसाईले नेपाली क्रिकेटमा नयाँ इतिहास रच्न आतुर रहेको बताउनुभएको छ ।
आईसीसी टी-ट्वान्टी विश्वकप क्रिकेटको तयारीका लागि भारत जान लागेको नेपाली टोलीको बिदाई कार्यक्रममा प्रशिक्षक देसाईले नेपाली टोलीले विश्वकप खेल्नु खुसीको कुरा भएको भन्दै सबैजना क्रिकेटमा नयाँ इतिहास रच्न आतुर रहेको बताउनुभएको हो । नेपाली क्रिकेटले पछिल्लो वर्ष राम्रो नतिजा निकालिरहेको र आगामी वर्ष पनि राम्रो रहने प्रशिक्षक माेन्टीले बताउनुभयो । एसीसी प्रिमियर कप अगाडि भारतमा हुने प्रतियोगिता नेपालका लागि फलदायी हुने उहाँले बताउनुभयो ।
नेपाल साविक विजेताका रुपमा एसीसी प्रिमियर लिगमा भाग लिन गइरहेकाले नेपाली टोली उत्साहि रहेको उहाँको भनाइ छ । नेपालले विश्वकप अगाडि यूएईमा एसीसी प्रिमियर लिग खेल्नेछ । त्यसअघि नेपालले तथा भारतका बरोडा र गुजराजतको टोलीसँग मैत्रीपूर्ण खेल खेल्नेछ ।
विदाइ कार्यक्रममा नेपाली टोलीका कप्तान रोहित पौडलले एसीसी प्रिमियर कपमा राम्रो नतिजासहित देश फर्कने विश्वास व्यक्त गर्नुभयो । उहाँले सरकारले घोषणा गरेको पुरस्कार रकममध्ये आधा जति मात्र पाएको भन्दै बाँकी रकम पनि विश्वकप अगाडि नै पाउनेमा आफू विश्वस्त रहेको बताउनुभयो ।
युवा तथा खेलकुदमन्त्री विराजभक्त श्रेष्ठले सबै पुरस्कार नपाएकोमा हौसला कम हुन नदिन आग्रह गर्दै उत्कृष्ट मनोबलका साथ खेल्न शुभकामना दिनुभयो । खेलाडीले पाउन बाँकी पुरस्कार रकम उपलब्ध गराउने प्रकृया सुर गरिसकेको उहाँले बताउनुभयो ।
नेपाल क्रिकेट संघ क्यानका सचिव पारस खड्काले टी–ट्वान्टी विश्वकप तयारीका क्रममा रहेकाले गुजरातमा हुने प्रतियोगिता महत्त्वपूर्ण हुने बताउनुभयो ।
नेपालले आउँदो आइतबार र चैत २१ गते मा गुजरातसँग तथा चैत २० र २३ गते बरोडासँग खेल्नेछ । टी–ट्वान्टी विश्वकप आउँदो जेठ १९ गतेदेखि अमेरिका र वेस्ट इन्डिजमा सुरु हुँदैछ । प्रतियोगितामा नेपाल दक्षिण अफ्रिका, श्रीलंका, बंगलादेश र नेदरल्यान्ड्ससँगै समुह डी मा रहेको छ ।
प्रकाशित मिति: बिहीबार, चैत १५, २०८०
