काठमाडौँ । दीपेन्द्रसिंह ऐरी अन्तर्राष्ट्रिय क्रिकेट परिषद् आइसिसीको टी–ट्वान्टी वरीयतामा ११ औँ स्थानमा उक्लिनुभएको छ । आईसीसीले सार्वजनिक गरेको पछिल्लो बरीयतामा दीपेन्द्र ४ स्थान फड्को मार्दै ११ औँ स्थानमा पुग्नुभएको हो ।
उहाँ ब्याटरतर्फ १६ स्थान उक्लिँदै ६१औँ स्थानमा पुग्नुभएको छ ।
ओमानमा जारी एसीसी प्रिमियर कपमा उत्कृष्ट प्रदर्शन गरिरहेका दीपेन्द्रले गत शनिवार एकै ओभरमा ६ छक्का प्रहार गर्दै कीर्तिमानी प्रदर्शन गर्नुभएको थियो । उहाँ एकै ओभरमा ६ छक्का प्रहार गर्ने नेपालको पहिलो , दक्षिण एसियाको दोस्रो र विश्वकै पाँचौँ खेलाडी बन्नुभएको छ । टी ट्वान्टी प्रतियोगितामा यो सफलता हात पार्ने उहाँ तेस्रो खेलाडी हुनुभएको छ ।
वरीयतामा नेपालका ब्याटर आसिफ शेखले ३६ स्थान फड्को मार्दै ७५औँ स्थानमा पुग्नुभएको छ । यस्तै, कप्तान रोहित पौडेल ५३ औँ स्थानमा र कुशल मल्ल सयौँ स्थानमा रहनुभएको छ । कुशल अलराउन्डर वरियतामा पाँच स्थानमाथि उक्लिएर २७ औँ स्थानमा हुनुहुन्छ । बलरतर्फ भने नेपालका कुनै पनि खेलाडी शीर्ष सयमा अटाउन सकेका छैनन् ।
टी ट्वान्टी ब्याटरमा भारतका सूर्यकुमार यादव पहिलो स्थानमा रहँदा बलरमा इङ्ल्यान्डका आदिल रसिद र अलराउन्डरमा बङ्गलादेशका सकिब अल हसन पहिलो नम्बरमा रहेको आईसीसीले जनाएको छ ।
प्रकाशित मिति: बुधबार, वैशाख ५, २०८१
