काठमाडौँ । कक्षा १२ को परीक्षा आजदेखि सुरु भएको छ । पहिलो दिन आज अनिवार्य अङ्ग्रेजी विषयको परीक्षा भइरहेको छ । बिहान ८ बजेदेखि सुरु भएको परीक्षा ११ बजेसम्म सञ्चालन हुनेछ ।
आउँदो २६ गतेसम्म चल्ने परीक्षाको लागि ७७ जिल्ला र जापानमा एक गरी एक हजार ५ सय २६ परीक्षा केन्द्र तोकिएको राष्ट्रिय परीक्षा बोर्डले जनाएको छ ।
बोर्डका अनुसार यस वर्ष चार लाख ९१ हजार ४ सय ९७ विद्यार्थीले फारम भरेका छन् ।
नियमिततर्फ एक लाख ९६ हजार ९ सय १४ छात्रा र एक लाख ९३ हजार ९ सय ३३ छात्र गरी तीन लाख ९० हजार ८ सय ४७ परीक्षार्थी रहेका र बाँकी ग्रेड वृद्धिका विद्यार्थी रहेको बोर्डले जानकारी दिएको छ ।
प्रकाशित मिति: शुक्रबार, वैशाख १४, २०८१, ०९:०५
