काठमाडाैँ । वेस्ट इन्डिज ‘ए’सँगको पहिलो टी ट्वान्टी क्रिकेटमा नेपाल ४ विकेटले विजयी भएको छ । २०५ रनको लक्ष्य नेपालले २ बल बाँकी छँदै ६ विकेट गुमाएर भेट्टाएको हो ।
नेपालका कप्तान रोहित पौडेलले ११२ रन बनाउनुभयो । उहाँले ५४ बलमा १० चौका र ६ छक्का प्रहार गर्नुभयो । दीपेन्द्रसिंह ऐरीले २४ तथा कुशल मल्ल र कुशल भुर्तेलले समान १६ रनको योगदान गर्नुभयो । ओपनर अनिल साह ५ रनमा तथा विवेक यादव ७ रनमा आउट हुनुभयो ।
त्यसअघि टस हारेर पहिले ब्याटिङ गरेको वेस्ट इन्डिज ‘ए’ले निर्धारित २० ओभरमा ५ विकेट गुमाएर २ सय ४ रन बनाएको थियो ।
वेस्ट इन्डिज ‘ए’का लागि कप्तान रोस्टन चेसले सर्वाधिक ७४ रन बनाउनुभयो । उहाँले ४६ बलमा ९ चौका र २ छक्का प्रहार गर्नुभयो । यसैगरी एलिक अथानाजेले २५ बलमा ४७ रन बनाउनुभयो ।
नेपालका अविनाश बोहरा, रोहित पौडेल, दीपेन्द्रसिंह ऐरी र कमल ऐरीले १–१ विकेट लिनुभयो ।
शृङ्खलाको दोस्रो खेल आइतबार हुने छ ।
प्रकाशित मिति: शनिबार, वैशाख १५, २०८१
