काठमाडौँ । प्रधानमन्त्री पुष्पकमल दाहाल प्रचण्डले टीट्वान्टी विश्वकप खेल्न लागेको नेपाली टोलीलाई जितका लागि शुभकामना दिनुभएको छ ।
आज एक शुभकामना सन्देश दिँदै प्रधानमन्त्री प्रचण्डले एक दशकपछि आज नेपाली क्रिकेट टिम विश्वकपमा खेल्न लागेको उल्लेख गर्दै यसले नेपालको गौरव थप बढाएको बताउनुभएको छ ।
"देशको प्रतिष्ठा बढाउन निरन्तर मेहेनत, सङ्घर्ष र सफलता प्राप्त गरेकोमा नेपाली क्रिकेट टिमप्रति हार्दिक धन्यवाद व्यक्त गर्दछु। मेरो नेतृत्वको सरकारले खेल क्षेत्रको विकास र खेलाडीहरूको प्रोत्साहनका लागि निरन्तर महत्वपूर्ण निर्णयहरू गरी कार्यान्वयन गर्दै आइरहेको छ। सगरमाथा र बुद्धको देश भनेर चिनिने नेपाल अब क्रिकेटको देशका रूपमा समेत स्थापित हुँदैछ। मेरो विश्वास छ– विश्वकपले नेपालको पहिचान थप उच्च बनाउनेछ, नेपाली टिमलाई ऐतिहासिक सफलता प्राप्त हुनेछ। उत्कृष्ट प्रदर्शनका लागि नेपाली टिमलाई मेरो हार्दिक शुभकामना छ।" प्रधानमन्त्रीले भन्नुभएको छ ।
प्रकाशित मिति: मंगलबार, जेठ २२, २०८१
