काठमाडौँ । टी ट्वान्टी विश्वकप क्रिकेटमा नेपाल दक्षिण अफ्रिकासँग १ रनले पराजित भएको छ । वेस्ट इन्डिजमा दक्षिण अफ्रिकाले दिएको ११६ रनको लक्ष पछ्याएको नेपालले २० ओभरमा ६ विकेट गुमाएर ११४ रन मात्र बनाउन सक्यो ।
हारसँगै नेपाल प्रतियोगिताबाट बाहिरिएको छ ।
अन्तिम बलमा जितका लागि २ रन चाहिएको नेपालका लागि गुल्सन झा रन आउट हुनुभयो । सोमपाल कामी ४ बलमा ८ रन बनाएर नटआउट रहनुभयो ।
नेपालका लागि ओपनर आशिफ शेखले सर्वाधिक ४२ रन बनाउनुभयो । यस्तै अनिल साहले २७ रन बनाउनुभयो । कुशल भुर्तेल १३, दीपेन्द्रसिंह एेरीले ६ र कुशल मल्लले ३ रन बनाउनुभयो । कप्तान रोहित पौडेल शून्य रनमा आउट हुनुभयो ।
दक्षिण अफ्रिकाका तबरेज सम्सीले ४ विकेट लिनुभयो ।
टस हारेर पहिले ब्याटिङ गरेको दक्षिण अफ्रिकाले २० ओभरमा ७ विकेट गुमाएर ११५ रन बनाएको छ । नेपालका कुशल भुर्तेलले ४ र दीपेन्द्रसिह ऐरीले ३ विकेट लिनुभयो ।
नेपालले समुह चरणको अन्तिम खेलमा सोमबार बंगलादेशसँग खेल्नेछ । नेपाल पहिलो खेलमा नेदरल्यान्ड्ससँग पराजित भएको थियो । यस्तै वर्षाका कारण श्रीलङ्कासँगको खेल सम्भव नभए पछि नेपालले अङ्क बाँडेको थियो ।
दक्षिण अफ्रिका प्रतियोगिताको अन्तिम ८ मा पुगिसकेको छ ।
प्रकाशित मिति: शनिबार, असार १, २०८१
