काठमाडौँ । राष्ट्रिय स्वतन्त्र पार्टी (रास्वपा) ले पार्टी महामन्त्री तथा प्रवक्ता डा मुकुल ढकाललाई ७ दिनका लागि निलम्बन गरेको छ ।
हिजो बसेको केन्द्रीय समितिको बैठकले पार्टी अनुशासन विपरीत अभद्र, अमर्यादित व्यवहार प्रदर्शन गर्नुका साथै पार्टीको छविमा प्रतिकूल प्रभाव पार्ने अभिव्यक्ति दिएकाले कारबाहीको निणर्य गरेको कार्यवाहक प्रवक्ता मनिष झाले जानकारी दिनुभयो ।
उहाँका अनुसार महामन्त्री ढकाललाई राजनीतिक दलसम्बन्धी ऐन २०७३ को दफा १८, राष्ट्रिय स्वतन्त्र पार्टीको विधानको धारा ५५.७ (क) र (ख) तथा धारा ५६ (१) तथा केन्द्रीय अनुशासन आयोगको नियमावली, २०८० को नियम ५.२ र परिच्छेद ७ को नियम १४ बमोजिम एवं केन्द्रीय अनुशासन आयोगले तत्काल गरेको सिफारिसका आधारमा निलम्बन गरिएको हो ।
ढकालका गतिविधिका बारेमा प्रतिवेदनसहित यथोचित कारबाहीको सिफारिस केन्द्रीय समितिमा पेश गर्न केन्द्रीय अनुशासन आयोगलाई निर्देशन दिने निणर्य पनि रास्वपाले गरेको छ ।
सभापति रवि लामिछानेको प्रस्तावमा अर्को व्यवस्था नहुन्जेलसम्मका लागि पार्टी सहमहामन्त्री कविन्द्र बुर्लाकोटीलाई कार्यवाहक महामन्त्री र पार्टी सहप्रवक्ता मनिष झालाई कार्यवाहक प्रवक्ता तोक्ने निणर्य रास्वपाले गरेको छ ।
प्रकाशित मिति: बिहीबार, असार २१, २०८१, ०७:५७
