काठमाडौँ । नेपाल रेडक्रस सोसाइटीले संस्थाबारे गलत समाचार आउने केरम नरोकिएको भन्दै त्यस्ता समाचारको खण्डन गरेको छ ।
केन्द्रीय कार्यालय सोल्टीमोडमा पत्रकार सम्मेलन गरी रेडक्रस सोसाइटीका अध्यक्ष सुदर्शनप्रसाद नेपाल तथा महामन्त्री भूपतिलाल श्रेष्ठले संवेदनशील क्षेत्रमा कार्यरत संस्थाको छवि कमजोर पार्न र भ्रम सिर्जना गर्न केही समयदेखि नियोजित रूपमा समाचारहरू आइरहेको भन्दै त्यसमा कुनै सत्यता नभएको दाबी गर्नुभयो । संस्थाभित्रको आधिकारिकताको विवाद १ वर्ष अघि नै भएको महाधिवेशन र त्यसपछिका विभिन्न कानुनी प्रक्रियाबाट टुङ्गो लागिसकेको भन्दै उहाँहरूले एकपक्षीय ढङ्गले समाचार सम्प्रेषण भइरहेकोप्रति आपत्ति जनाउनुभयो ।
समाज कल्याण परिदले दिने जायज सुझाव मान्न सोसाइटी सधैँ तयार रहेको तर यसअघि नै निरूपण भएका विषयमा हस्तक्षेपकारी र पूर्वाग्रही रूपमा आए मान्य नहुने उहाँले बताउनुभयो । तर अहिलेसम्म छानबिन समिति र परिषद्को आधिकारिक पूर्ण प्रतिवेदन कार्यालयमा प्राप्त भई नसकेको बरु सञ्चारमाध्यमबाट थाहा भएकाले भन्दै उहाँले आपत्ति जनाउनुभयो ।
सोसाइटीका महामन्त्री भूपतिलाल श्रेष्ठले सोसाइटीको रक्तसञ्चार सेवा र संस्थागत सुशासनका सम्बन्धमा प्रकाशित विभिन्न समाचारप्रति नेपाल रेडक्रस सोसाइटीको गम्भीर ध्यानाकर्षण भएको बताउनुभयो । जिल्ला प्रशासन कार्यालय काठमाडौँको मिति गत असार १० गतेको पत्र र सोसाइटीको विधान बमोजिम गत वर्षको असार २७ र २८ गते काठमाडौँमा केन्द्रीय कार्यसमितिको विशेष महाधिवेशन गरी अदालत, सरकार, समाज कल्याण परिषद् लगायत विभिन्न दातृ निकायले समेत मान्यता दिइसकेको स्मरण गराउँदै अहिले पनि समानान्तर समिति रहेको भन्ने जस्ता काल्पनिक समाचार आएकोमा आपत्ति जनाउनुभयो ।
कुनै समय रेडक्रसमा जागिर खान आएका व्यक्तिलाई नै विज्ञ भनेर छानबिनका लागि पठाइएकाले पनि परिषद् र छानबिन समिति निष्पक्ष नरहेको पुष्टि हुने उहाँको भनाइ छ । समाचार लेख्दा संस्थाकाे धारणाबारे बुझ्ने काम पनि नगरिएकोमा उहाँले आपत्ति जनाउनुभयो ।
नेपाल रेडक्रस सोसाइटीले अहिले केन्द्रीय रक्तसञ्चार सेवा लगायत प्रादेशिक र जिल्ला तहमा गरी एक सय भन्दा बढी स्थानमा स्वयंसेवक परिचालन गरी रक्तसञ्चार सेवा प्रदान गरिरहेको जानकारी दिँदै पत्रकार सम्मेलनमा विश्व स्वास्थ्य सङ्गठन लगायत सूचीकृत रिएजेन्ट, परीक्षण र उपकरणहरुको प्रयोगबाट सेवा भई आएको, राष्ट्रिय रक्तसञ्चार नीति २०७१ मा उल्लेख भए अनुसार रक्तदाता छनोट, रक्त संक्रमण परीक्षण, उपकरणको मर्मत सम्भार र फोहर व्यवस्थापनका मापदण्डहरु पालना गरी सेवा प्रदान गरिने हुँदा गुणस्तरीय सेवा प्रवाह भइरहेको महामन्त्री श्रेष्ठले बताउनुभयो ।
वर्तमान अवस्थामा देशभरि आएको बाढी पहिरोजस्ता विपद्को समयमा नेपाल रेडक्रस सोसाइटीका स्वयंसेवकहरू अहोरात्र खोज, उद्धार तथा राहत वितरणमा संलग्न रही संकटासन्न समुदायमा जीवन रक्षाका लागि खटिईरहेको उहाँले जानकारी दिनुभयो ।
प्रकाशित मिति: बुधबार, असार २७, २०८१, २०:०९