काठमाडौँ । नेपाल प्रहरीले पानी पर्ने क्रम चलिरहेको रहेको र देशका विभिन्न क्षेत्रमा राजमार्गमा अवरोध भइरहेकाले लामो यात्रामा निस्किनु अघि सडकको अवस्थाबारे बुझ्नअनुरोध गरेको छ । प्रहरी प्रवक्ता डीआईजी दानबहादुर कार्कीले बीच बाटोमै यात्रु अलपत्र हुने अवस्था देखिएकाले सडकको अवस्था बुझेर मात्रै यात्रा गर्न अनुरोध गरिएको जानकारी दिनुभयो ।
विभिन्न स्थानमा आएको बाढी तथा पहिरोले सडक ठाउँठाउँमा भत्किएक, भासिएको तथा अवरुद्ध भएको तथा पानी पर्ने क्रम नरोकिएकाले थप अवरोधको सम्भावना पनि कायमै रहेकाले विशेष ख्याल गर्न नागरिकहरुसँग आग्रह गरेको बताउनुभयो ।
अवरोध नभएका राजमार्गमा पनि यातायातका साधनको चापका कारण जाम भइरहेकाले सकेसम्म यस्तो अवस्थामा यात्रा नगर्न र यात्रा गरिहाले पनि जानकारी लिएर मात्रै गर्न आग्रह गरिएको प्रवक्ता डीआईजी कार्कीले बताउनुभयो ।
सम्पर्कका लागि नेपाल प्रहरीको १००, ट्राफिक प्रहरीको १०३, बालबालिका खोजतलास समन्वय केन्द्रको १०४ र प्रहरी गुनासाकोको १११३ नम्बरमा सम्पर्क गर्न सकिने छ ।
यसैबिच, यता जल तथा मौसम विज्ञान विभागका अनुसार आजदेखि तीन दिन देशभर मौसम बदली भई ठाउँठाउँमा वर्षा हुने सार्वजनिक सूचना जारी गरेकाले विशेष सावधानी अपनाउन राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि नागरिकलाई अनुरोध गरेको छ ।
प्रकाशित मिति: बिहीबार, असार २८, २०८१, १६:०२
