चितवन । नारायणगढ-मुग्लिन सडकखण्डमा पहिरोसँगै बेपत्ता भएका बस र यात्रुको खोजीका लागि सशस्त्र प्रहरीको गोताखोर टोली परिचालित भएको छ ।
पहिरोसँगै बस त्रिशुलीमा खसेको र खोजी तथा उद्धारका लागि गोताखोरको टोली बिहानैदेखि जुटेको चितवनका प्रमुख जिल्ला अधिकारी इन्द्रदेव यादबले जानकारी दिनुभयो । उहाँका अनुसार दुईवटै बसमा गरी करिब ६५ यात्रु रहेको अनुमान गरिएको छ ।
चितवनको भरतपुर महानगरपालिका २९ सिमलतालमा आज बिहान साढे ३ बजेतिर वीरगन्जबाट काठमाडौं आइरहेको तथा काठमाडौंबाट गौर गइरहेको बस पहिरोले बगाएको जिल्ला प्रहरी कार्यालय चितवनका प्रवक्ता डिएसपी भेषराज रिजालले सीआईएनलाई जानकारी दिनुभयो ।
तीन जनाले भने गाडीबाट हामफालेर ज्यान जोगाएका पनि डिएसपी रिजालले सीआईएनसँग बताउनुभयो ।
चितवनको १७ किलो भन्ने ठाउँमा माथिबाट खसेको ढुङ्गा लागेर अर्को एउटा बसका चालकको मृत्यु भएको उहाँले जानकारी दिनुभयो ।
लगातार झरी परेकाले बाढी, पहिरो र डुबानको जोखिम बढेको भन्दै काम नपरी लामो यात्रा नगर्न सरकारले अनुरोध गरेको छ ।
पोखरा र चितवनमा घटना भए लगत्तै बिहानै बसेको मनुसन पूर्वतयारी तथा प्रतिकार्य कमाण्ड पोष्टको आपतकालीन बैठकले अत्यावश्यकबाहेक लामो यात्रामा ननिस्कन सबैसँग अनुरोध गरेको हो ।
कमाण्ड पोष्टका संयोजक डा.भिष्म कुमार भुसालले गण्डकी, बाग्मती र लुम्बिनी प्रदेशमा अति जरुरी बाहेक लामो यात्रामा ननिस्किन अनुरोध गर्नुभयो ।
राष्ट्रिय विपद् जोखिम न्यूनिकरण तथा व्यवस्थापन प्रधिकरणका अनुसार हाल देशभरका २ सय ४९ सडकखण्डमध्ये १६ वटा सडकखण्ड पूणर् रुपमा बन्द भएका छन् ।
१ सय २० सडकखण्डमा भने एकतर्फमात्रै गाडी गुडिरहेका छन् । तर पानी परिरहेकाले बाढी, पहिरो र डुबानको जोखिम रहेकाले अनावश्क नहिँड्न भुसालको सुझाव छ ।
प्रकाशित मिति: शुक्रबार, असार २८, २०८१
