काठमाडौँ । प्रधानमन्त्री पुष्पकमल दाहाल प्रचण्डले संसद्को पहिलो र दोस्रो ठुलो दल मिल्नु र त्यसको सहमतिका लागि मध्यरातको समय खोज्नुले शङ्का जन्माएको बताउनुभएको छ । प्रतिनिधिसभामा आज विश्वासको मत माग्दै उहाँले संसारका कुनै पनि लोकतान्त्रिक देशमा पहिलो र दोस्रो ठुलो दल मिलेको इतिहास नभएको भन्दै नेपालमा कांग्रेस र एमाले मिल्नुले शङ्का जन्माएको उहाँले दाबी गर्नुभयो ।
दुई दलको सहमति मध्यरातमा र व्यापारीहरूको घरमा हुनुले शङ्का उब्जाएकोमा एमाले अध्यक्ष केपी शर्मा ओलीले सहमति गरिसकेपछि पनि आफूलाई सहमति भएको छैन भनेर ढाँटेको तर काँग्रेस सभापति शेरबहादुर देउवाले सहमति भइसकेको बताएको उल्लेख गर्दै उहाँले यसरी डराउनुपर्ने अवस्था के थियो भनेर प्रश्न गर्नुभयो ।
दुई मुख्य प्रतिस्पर्धी दल मिलेर सरकार चलाउने अनौठो अभ्यास नेपालमा सुरु भएको भन्दै उहाँले त्यसमाथि पनि संविधान संशोधन गर्ने कुरा गरिनु झन् शंकास्पद् र डरलाग्दो भएको उहाँको भनाई छ ।
आफू सरकारबाट हटे पनि यी विषयको अनुसन्धान कसरी अघि बढ्छ भन्ने कुरामा निरन्तर खबरदारी गरिरहने प्रधानमन्त्री प्रचण्डको भनाई छ ।
बाल मन्दिर र त्रिभुवन विश्वविद्यालयको जग्गा खोजी गर्ने, नक्कली भुटानी शरणार्थीबारेको अनुसन्धान गर्ने जस्ता कामलाई प्रभावकारी रूपमा अघि बढाएपछि अतालिएको समूहले कांग्रेस र एमालेलाई मिलाएको उहाँले आरोप लगाउनुभयो । यति धेरै उच्च तहका व्यक्तिहरू यसअघि कहिल्यै नसमातिएको भन्दै उहाँले प्रहरीले पूर्वगृह मन्त्री र पूर्वउपप्रधानमन्त्रीलाई पक्राउ गरेको विरल इतिहास रचेको तर त्यसबाट अतालिएर काँग्रेस र एमालेले गठबन्धन गरेको प्रधानमन्त्रीको आरोप छ ।
आफ्नो पालामा आर्थिक र सुशासनको क्षेत्रमा धेरै ठुलो सुधार गरेको उहाँको दाबी छ ।
प्रकाशित मिति: शुक्रबार, असार २९, २०८१, १२:४१
