काठमाडौँ । वैदेशिक रोजगारीमा जाने नेपाली महिलाको सङ्ख्या पाँच वर्षमा झन्डै तेब्बरले बढेको छ ।
वैदेशिक रोजगार विभागका अनुसार ५ वर्ष अघि कामको लागि २८ हजार ४३३ जना नेपाली महिला विदेश गएकोमा गत आर्थिक वर्षमा यो सङ्ख्या १ सय ८१ प्रतिशतले बढेर ८० हजार १ सय ७२ पुगेको छ ।
जसमध्ये संस्थागत श्रम स्वीकृति लिएर ३७ हजार ७१८ जना र व्यक्तिगत श्रम स्वीकृति लिएर २० हजार ६३५ महिला रोजगारीका लागि बिदेसिएका छन् । सरकारी प्रक्रियामार्फत कोरिया, इजरायल र बेलायत जाने महिलाको सङ्ख्या भने १ हजार २०४ जना रहेकोमा बेलायतमा नर्स कार्यक्रम अन्तरगत ४१ जना मात्रै गएको विभागका सूचना अधिकारी गुरुदत्त सुवेदीले सीआईएनसँग बताउनुभयो ।
पछिल्लो समय शिक्षामा महिलाको पहुँच बढ्दै गएको र रोजगारीका लागि नयाँ नयाँ गन्तब्य बढ्दै गएकोले वैदेशिक रोजगारीमा जाने महिलाको सङ्ख्या बढेको उहाँले बताउनुभयो । यसैबिच, इजरायलमा नेपाली कामदार पठाउने विषय विवादित बन्दै गएको छ ।
इजरायलको दीर्घकालीन स्याहार केन्द्रमा नेपालबाट जान चाहने सहायक कामदार अर्थात् केयर गिभरमा आवेदन दिनेहरूले विभागमा नक्कली कागजात पेस गरेको आशङ्का गरिएको छ । छनोट प्रक्रियालाई विश्वसनीय बनाउन सरकारले श्रम रोजगार तथा सामाजिक सुरक्षा मन्त्रालयले उपसचिव मेघनाथ रिमालको संयोजकत्वमा पाँच सदस्यीय छानबिन समिति गठन गरेको छ ।
छानबिन समितिले गर्ने परीक्षणमा कागजात नक्कली पेस गरेको पाइए त्यस्ता व्यक्तिको आवेदन रद्द गरिने मन्त्रालयका सहायक प्रवक्ता महेश पराजुलीले बताउनुभयाे ।
प्रकाशित मिति: आइतबार, साउन २७, २०८१
