बाजुरा । बाजुराको गौमुल गाउँपालिकाले पहिरोको जोखिमका रहेका बस्तीलाई सार्नका लागि सङ्घीय सरकारलाई अनुरोध गर्ने निर्णय गरेको छ ।
मानव बस्ती बस्न लायक नभएका र भूगर्भविद्हरूले नै बस्ती सार्न सिफारिस गरेका गाउँपालिका क्षेत्र भित्रका सबै बस्तीलाई सार्न पहलका लागि सङ्घीय सरकारलाई आग्रह गर्ने निर्णय गरिएको गाउँपालिकाका प्रवक्ता वीरेन्द्र रोकायाले जानकारी दिनुभयो ।
गाउँपालिकाको केन्द्र घटमुनामा आज बसेको ३५ औँ कार्यपालिका बैठकले यस्तो निर्णय गरेको हो । गाउँपालिकाका दुई दर्जनभन्दा बढी बस्तीहरू पहिरोको उच्च जोखिममा छन् ।
तत्कालका लागि जोखिममा रहेका गाउँपालिका १ को अन्द्राढी, ६ को टुनी, बाम्नी, शान्ति टोल र गैरीबाडाका सबै बस्ती सार्न पहल गर्ने निर्णय गरिएको अध्यक्ष हरिबहादुर रोकायाले बताउनुभयो ।
गौमुलमा गएको साता मात्र पहिरोकै कारण आमा छोरीको मृत्यु भएको थियो भने ५ जना घाइते भएका थिए । अहिले दर्जनौँ परिवार पाल टाँगेर बस्ने गरेका छन् । कार्यपालिकाको बैठकले सङ्घीय सरकारसँग पहिलो माग नै बस्ती सार्नका लागि हुने बताएको छ ।
एकीकृत बस्ती विकासको कार्यक्रम पनि नमुनाका लागि भनेर बाजुरामै सञ्चालन गर्ने भनिएको छ तर त्यसको कार्यान्वनका लागि गतिविधी सञ्चालन भए नभएको जानकारी नै छैन । बस्ती सार्नुको विकल्प नै नभएकोले बस्ती विकास कार्यक्रमबाट संवोधन गरिनुपर्ने माग गाउँपालिकाको छ । आजै बसेको कार्यपालिका बैठकले पहिरोका कारण ज्यान गुमाएकाप्रति श्रद्धाञ्जली व्यक्त गरेको छ ।
जोखिममा रहेका बस्तीका परिवारलाई संयमित र पूर्व तयारीका साथ बस्न आग्रह गर्ने निर्णय पनि भएको छ । गाउँपालिकाले नियुक्त गरेका १० जना स्वयमसेवक शिक्षकलाई काठमाडौंस्थित रातो बङगलामा अभ्यास शिक्षण सिकाईका लागि पठाउने निर्णय गरिएको ६ नम्बर वडाका अध्यक्ष प्रकाश रोकायाले जानकारी दिनुभयो ।
यसैबीच गौमुल गाउँपालिका–६ बसाला शान्ति टोलमा पुःन पहिरोले एक घर भत्किएको छ । पहिरोले स्थानीय बम चदाँरा, सिरे चदाँरा, धने चदाँराको घर भत्किएको छ । केही दिन पहिला सोही टोलमा पहिरोका कारण आमाछोरीको मृत्यु भएको थियो ।
नजिकै गोठ, छाना पनि नभएको र सबै परिवार गएर बस्न मिल्ने ठूलो चौर नहुँदा घरमै बस्नु पर्ने बाध्यता रहेको स्थानीयको दुःखेसो छ । गौमुल गाउँपालिकाले भने टोलका सबैलाई पाल दिएर सुरक्षित स्थानतर्फ जान आग्रह गरेको जनाएको छ ।
प्रकाशित मिति: शनिबार, साउन २५, २०७६
