काठमाडाैँ । आज रातिदेखि ठुलो पानी पर्ने क्रम कम हुँदै जाने मौसमविद्ले बताएका छन् ।
देशभर मनसुनी वायुको प्रभाव रहेको र पूर्वी तथा मध्य भागमा बङ्गलादेश आसपासको क्षेत्रमा बनेको न्यून चापीय प्रणालीको आंशिक प्रभाव रहेकाले आज दिउँसो कोसी, बागमती र गण्डकी प्रदेशका थोरै तथा बाँकी प्रदेशका एक दुई स्थानमा मेघ गर्जन र चट्याङ्गसहित हल्कादेखि मध्यम खालको पानी पर्ने सम्भावना रहेको मौसम पूर्वानुमान महाशाखाले जनाएको छ ।
महाशाखाका मौसमविद् गोविन्द झाले कोसी प्रदेशका एक दुई स्थानमा आज ठुलो पानी पर्न सक्ने पनि सम्भावना रहेको तर आज रातिदेखि ठुलो पानी पर्ने क्रम घट्दै जाने सीआईएनसँग बताउनुभयो । तर मनसुन नेपालबाट नबाहिरिएको तथा स्थानीय वायु सक्रिय हुनसक्ने भएकाले हल्कादेखि मध्यम वर्षा भने अझै केही दिन हुनसक्ने उहाँले बताउनुभयो ।
आज राति कोसी, बागमती र गण्डकी प्रदेशका थोरै तथा बाँकी प्रदेशका एक दुई ठाउँमा चट्याङ्गसहित हल्कादेखि मध्यम खालको पानी पर्ने सम्भावना रहेको महाशाखाले जनाएको छ ।
प्रकाशित मिति: शुक्रबार, असोज १८, २०८१, ०८:३९
