कालीकोट । कालीकोटको नरहरिनाथ गाउँपालिका वडा नं १ कोटबाडामा निर्माण सम्पन्न भएको सुनथराली विमानस्थलमा औपचारिक उद्घाटन भएको सात महिना बित्दा पनि नियमित उडान हुन सकेको छैन ।
करिब ३७ वर्ष लगाएर निर्माण सम्पन्न भएको यो विमानस्थलमा अहिलेसम्म नियमित उडान हुन सकेको छैन । गत फागुन १३ गते परीक्षण उडान र १४ गते औपचारिक उद्घाटन भए पनि त्यसपछि जहाज फर्केर नआएकोमा स्थानीयबासी खुसी छैनन् ।
उद्घाटनका बेला तत्कालीन उपप्रधान तथा रक्षामन्त्री पूणर्बहादुर खड्काले उडानलाई निरन्तरता दिने प्रतिबद्धता जनाउनुभएको थियो ।
कोटबाडाका स्थानीय गणेश विष्टले विमानस्थल निर्माणका बेला धेरै मजदुरले ज्यान गुमाए पनि नियमित उडान हुन्छ कि भनेर आस मानेको तर यतिका समयसम्म नहुँदा खिन्न भएको बताउनुभयो ।
कालीकोटका बासिन्दाले आपत्कालीन रूपमा तत्कालै जिल्लाबाहिर जानुपरेमा वा बिरामी भएमा हेलिकोप्टर बाहेकको अर्को विकल्प छैन ।
नियमित विमानस्थल सञ्चालनमा आएमा दैनिक सुर्खेत, नेपालगन्ज जानेका लागि सजिलो हुन्छ ।
प्रतिनिधि सभाका सदस्य महेन्द्रबहादुर शाहीले कालीकोटवासीको हवाईजहाज चढ्ने हैसियत नभएको भन्ने राज्यको बुझाइ भएकाले उद्घाटनपछि जहाज नआएको टिप्पणी गर्नुभयो ।
उहाँले राज्यको दृष्टि पुग्न नसक्दा यस्तो अवस्था आएको आरोप लगाउनुभयो ।
तत्कालीन जिल्ला विकास समितिका उपसभापति तुलाराज विष्टले विमानस्थल तयार भएको तर उडान नहुँदा सुविधा उपयोग गर्न नसकिएको बताउनुभयो ।
नरहरिनाथ गाउँपालिकाले हप्ताको एक दिनसम्म भए पनि उडानका लागि पहल गरेको थियो । भाडा दरलगायत केही काम गाउँपालिकाकै पहलमा भएका थिए तर अहिलेसम्म त्यसले पूणर्ता पाएको छैन ।
गाउँपालिका प्रवक्ता तथा वडा नं ९ का वडा अध्यक्ष प्रदीप बोहोराले उद्घाटनका बेला आएको नेपाल एयरलाइन्सको जहाजले तीन हजार ९ सय ५० रुपैयाँमा उडान भर्ने सहमति भए पनि पछिल्ला दिनमा सो सहमति कार्यान्वयन नभएको बताउनुभयो ।
निजी क्षेत्रको तारा एयरलगायतका अरू हवाई कम्पनीले भाडा दर ५ हजार ६ सय रुपैयाँ तोकेका छन् । त्यस कारण उडान हुन नसकेको बताइएको छ ।
प्रकाशित मिति: आइतबार, असोज २०, २०८१
