काठमाडौँ। आगामी शनिवारदेखि सुरु हुने नेपाल प्रिमियर लिग (एनपिएल) को ट्रफी आज एक कार्यक्रमका बीच सार्वजनिक गरिएको छ ।
सुन्धारास्थित धरहरा परिसरमा आज बिहान आयोजित कार्यक्रममा प्रधानमन्त्री केपी शर्मा ओलीले एनपीएलमा सहभागी ८ टोलीका मार्की खेलाडीका साथ ट्रफी सार्वजनिक गर्नुभएको हो ।
अनावरण कार्यक्रममा प्रधानमन्त्री ओलीले मार्की खेलाडीका बारेमा आफ्नो विचार राख्दै जितका लागि शुभकामना दिनुभयो ।
आगामी दिनमा महिलाको पनि खेल आयोजना गर्न उहाँले नेपाल क्रिकेट सङ्घ (क्यान) लाई सुझाव दिनुभयो ।
क्यानका सचिव पारस खड्काले ट्रफीमा कालापथ्थरबाट ल्याइएको ढुङ्गा प्रयोग गरिएको जानकारी दिनुभयो ।
कार्यक्रममा क्यान पदाधिकारी एनपीएलका टोलीका मालिकलगायतको उपस्थिति थियो।
प्रकाशित मिति: सोमबार, मंसिर १०, २०८१, ११:२५
