काठमाडौं ।
सुदूरपश्चिम प्रदेश सरकारले पूर्ण स्तनपान गराउने महिलाको संख्या बढाउन विशेष कार्यक्रम ल्याउने भएको छ ।
हरेक वर्ष पूर्ण स्तनपान गराउने महिलाको संख्या घटिरहेको भन्दै प्रदेश सरकारले यसै वर्षबाट त्यो कार्यक्रम सुरु हुने बताएको हो ।
समग्र देशमै स्तनपान गराउने महिलाको संख्या घटिरहेका बेला सुदूरपश्चिममा पनि रोजगारी तथा विभिन्न क्षेत्रमा महिलाको संलग्नता बढेसँगै नियमित स्तनपान गराउने महिलाको संख्या घट्दै गएको प्रदेश सरकारको भनाइ छ ।
सीआईएनसँग कुराकानी गर्दै स्वास्थ्य निर्देशनालय, सुदूरपश्चिमका जनस्वास्थ्य अधिकृत रमेश मलासीले प्रदेश सरकारले पहिलो वर्ष प्रदेश मातहत रहेका सबै स्वास्थ्य संस्थामा स्तनपान कक्ष स्थापना गर्ने बताउनुभयो ।
सुदूरपश्चिमका विभिन्न स्वास्थ्य संस्थामा काम गर्ने महिलाहरुले समेत नियमित स्तनपान गराउन नपाएको भन्दै मलासीले सूरुवात स्वास्थ्य संस्थाबाटै गर्न लागिएको र यसका लागि सरकारले बजेट समेत छुट्याइसकेको जानकारी दिनुभयो ।
उहाँले भन्नुभयो, ‘यो आर्थिक वर्षमा हामीले बजेट पनि छुट्याइसकेका छौं । प्रदेश मातहत रहेका सबै स्वास्थ्य संस्थामा यो वर्ष कार्यक्रम सुरु हुन्छ र अर्को वर्षबाट हामी अन्य कार्यालय तथा संघ संस्थामा पनि कार्यक्रम सुरुवातका लागि पहल गर्नेछौं ।’
सानो बच्चा घरमा छोडेर घण्टौं श्रम गर्न जाने महिला र उनीहरुको परिवारलाई लक्षित गरी आमाको दूधको महत्व बुझाउने विभिन्न सचेतनाको कार्यक्रम ल्याइने पनि उहाँले जानकारी दिनुभयो ।
नेपालमा ५ वर्ष अघि ७१ प्रतिशत महिलाले पूर्ण स्तनपान गराउँदै आएकोमा हाल ६६ प्रतिशत महिलाले मात्रै पूर्ण स्तनपान गराउने गरेका सरकारी तथ्यांक छ ।
अडियो सुन्नुहोस् :
प्रकाशित मिति: शनिबार, साउन ३२, २०७६
