काठमाडौँ । युवा तथा साना व्यवसायी स्वरोजगार कोषले हरेक वर्ष एकलाख युवालाई स्वरोजगार बनाउने प्रस्ताव तयार गरी स्वीकृतिका लागि पठाएको छ ।
कोषले राष्ट्रिय योजना आयोग, अर्थ मन्त्रालय र युवा तथा खेलकुद मन्त्रालयमा प्रस्ताव पेश गरेको कार्यकारी निर्देशक विश्वमोहन अधिकारीले सीआइएनसँग बताउनुभयो ।
उहाँका अनुसार आयोग र मन्त्रालयले स्वीकृत गरेमा १ लाख युवालाई रोजगारी दिन बाटो खुल्नेछ । कोषले बैँक, वित्तीय संस्थालाई बढीमा ५ करोडसम्म र सहकारी संस्थालाई बढीमा १ करोडसम्म कर्जा दिने गरेको छ ।
१८ वर्षदेखि ६० वर्ष नलागेका युवाले आफ्नो नजिकको बैँक तथा वित्तीय संस्थाबाट २ लाखदेखि ५ लाखसम्म ऋण लिन सक्ने व्यवस्था छ ।
१५ वर्षको अवधिमा १ लाख ९ हजार युवालाई स्वरोजगार बनाएको युवा तथा साना व्यवसायी स्वरोजगार कोषले जनाएको छ ।
हाल हरेक वर्ष १० हजार युवालाई स्वरोजगार बनाउने गरी लगानी गर्दै आएको कोषले यसलाई बढाएर १ लाख बनाउने प्रस्ताव गरेको हो ।
रकम अभावका कारण हरेक वर्ष १० हजार युवालाई पनि स्वरोजगार बनाउन नसकिएको कोषको भनाइ छ ।
आर्थीक वर्ष २०७९/२०८० मा ६ हजार युवालाई मात्र स्वरोजगारका लागि ऋण प्रदान गरेको कोषले २०८०/०८१ मा भने कुनै पनि कार्यक्रम सञ्चालन गरेन ।
प्रकाशित मिति: आइतबार, माघ २०, २०८१
