काठमाडौँ । जुनसुकै धर्म भए पनि हानिकारक प्रथा अन्त्यका लागि एक जुट हुनुपर्नेमा धार्मिक अगुवाहरूले जोड दिएका छन् ।
विश्व अन्तरधार्मिक संवाद सप्ताहको अवसरमा निरन नेपाल, वर्ल्ड भिजन इन्टरनेसनल नेपाल र सामुदायिक रेडियो प्रसारक सङ्घ (अकोराब) नेपालले ललितपुरमा गरेको कार्यक्रममा वक्ताले जुनसुकै धर्म भए पनि सबैको उद्धेश्य शान्ति नै रहेको बताएका हुन् ।
समाजमा कुरीतिको रूपमा रहेका बालविवाह, दाइजो प्रथालगायतका गलत अभ्यास अन्त्य गर्न अन्तरधार्मिक क्षेत्रले भूमिका खेल्नु पर्ने सबै धार्मिक अगुवाले जोड दिएका छन् ।
उनीहरूले सबै धर्मको मूल मर्म नै शान्ति भएको भन्दै एकआपसमा सद्भाव बोकेर हिँड्न आवश्यक रहेकोमा जोड दिए ।
निरन नेपालले हालम्म ४८ स्थानीय तहमा अन्तरधार्मिक सञ्जाल गठन गरिसकेको छ ।
मोहम्मद सल्मानले कुनै पनि समस्या छलफलबाट नै समाधान हुने भएकाले एक ठाउँ हुन आवश्यक रहेको बताउनुभयो ।
उहाँले समाजमा बेला बेला धर्मको नाममा हुने टिकाटिप्पणीले सद्भाव कायम नहुने भएकाले सबै धार्मिक अगुवा एक भएर अघि बढ्नुपर्नेमा जोड दिनुभयो ।
असोधाराका प्राचार्य नम्रता पाण्डेले दिगो विकास लक्ष्यले पनि शान्तिको कल्पना गरेको भन्दै सबै एक भएर लाग्नुपर्ने बताउनुभयो ।
कार्यक्रमका सहभागीले पछिल्लो समय सामाजिक संजालमार्फत धर्मको गलत प्रचार भइरहेकाले त्यसलाई रोक्न धार्मिक अगुवा सक्रिय हुनुपर्ने बताएका छन् ।
कुनै एक व्यक्तिले गलत प्रचार गरे पनि त्यसलाई रोक्ने निकाय नै नभएकाले धार्मिक अगुवा यसमा लाग्नुपर्ने अभियन्ता रामचन्द्र भण्डारीको भनाइ छ ।
कार्यक्रममा हिन्दु, इश्लाम, बौद्ध, इसाइ, जैन लगायतका धर्मका धर्मगुरुको उपस्थिती थियो ।
कार्यक्रममा सामुदायिक रेडियो प्रसारक सङ्घका अध्यक्ष अर्जुन गिरीले सामुदायिक रेडियोहरुले सबै धर्मका धर्मगुरुहरुको साथमा बालविवाह अन्त्य, कुपोषण अन्त्य लगायतका अभियानहरु गरिरहेको बताउनुभयो ।
निरन नेपालका अध्यक्ष भिक्षु पिया दासीले सबै धर्मको साझा थलोको रुपमा निरनले कामगरिरहेको जानकारी गराउनुभयो ।
प्रकाशित मिति: शुक्रबार, माघ २५, २०८१, १८:३१
