काठमाडौँ । आज १४ औँ विश्व रेडियो दिवस, नेपालमा पनि विभिन्न कार्यक्रम गरी मनाइँदैछ ।
यसपालीको विश्व रेडियो दिवसको नारा ‘रेडियो र जलवायु परिवर्तन’ भन्ने रहेको छ । दिवसको अवसरमा सामुदायिक रेडियो प्रसारक सङ्घ (अकोराब) नेपालको आयोजनामा आज ललितपुरमा विशेष कार्यक्रम हुँदैछ ।
अकोराबका अध्यक्ष अर्जुन गिरीले जलवायु परिवर्तनको असरका बारेमा समुदायस्तरमा सूचना र सचेतना जगाइरहेका सामुदायिक रेडियोले आफ्नो अस्तित्व जोगाउँदै अघि बढ्नुपर्ने अवस्था रहेको बताउनुभयो ।
सन् २०१२ मा संयुक्त राष्ट्रसङ्घको महासभाले अन्तर्राष्ट्रिय दिवसको रूपमा स्वीकार गरेपछि प्रत्येक वर्षको फेब्रुअरी १३ मा विश्व रेडियो दिवस मनाउने गरिएको छ ।
अकोराबका अनुसार नेपालमा हाल तीन सय ८६ सामुदायिक रेडियो छन् ।
शेयरकाष्ट इनिशियटिभ नेपालले कोरोना महामारीका समयमा गरेको राष्ट्रिय सर्वेक्षणमा सहभागीमध्ये करिब ८० प्रतिशतले रेडियो सुन्ने बताएका थिए भने नेपाल मिडिया सर्वेक्षण २०२२ अनुसार ४५ दशमलव २ प्रतिशतले रेडियो सुन्ने बताएका थिए ।
पछिल्लो समय प्रविधिको बढ्दो विकाससँगै नेपालमा रेडियो सुन्ने स्रोताको सङ्ख्या घटेको देखिएको छ ।
यद्यपी भूकम्प, बाढी पहिरो जस्ता विपत्तिदेखि स्वास्थ्य महामारी, निर्वाचन लगायतका घटना विशेषको समयमा भने स्रोता बढ्ने गरेका छन् ।
अर्थात् विषम परिस्थिति वा आपतकालीन अवस्थामा सूचना, सञ्चार तथा समाचारका लागि मानिसहरु रेडियोमै भर पर्ने गरेको देखिन्छ ।
आम स्रोताले भने रेडियोले आफ्ना सामग्री समय सापेक्ष बनाउनु पर्ने बताएका छन् । प्रविधिको भरपुर उपयोग गर्दै, शिक्षा, स्वास्थ्य, कृषि रोजगारी, जस्ता विषयमा समाचार तथा कार्यक्रम उत्पादन गर्न उनीहरुको सुझाव छ ।
प्रकाशित मिति: बिहीबार, फागुन १, २०८१, १०:२२
