संखुवासभा । संखुवासभामा निर्माणाधीन ९ सय मेगावाट क्षमताको अरुण तेस्रो परियोजना प्रवेश मार्गका छयाङ्कुटी–दिदिङ्ग सडक खण्डको जग्गाधनीहरूलाई छुट मुआब्जा रकम वितरण सुरु गरिएको छ ।
१ सय ३४ घरपरिवारलाई ४ सय ५४ रोपनी छुट जग्गाको मुआब्जा वितरण सुरु गरिएको संखुवासभाका प्रमुख जिल्ला अधिकारी विनोद खड्काले जानकारी दिनुभयो ।
१ सय ३४ रोपनी जग्गाको प्रति रोपनी ११ लाख ७५ हजारका दरले ५३ करोड ५८ लाख रकम अरुण तेस्रो जलविद्युत्त आयोजना निर्माण गर्ने भनेर सरकारले २०४२/४३ सालमा जग्गाधनीको जग्गा अधिग्रहण गरेको थियो ।
तत्कालीन समयमा विश्व बैँकको लगानीमा अरुण तेस्रो जलविद्युत्त आयोजान निर्माण गरिने भनिए पनि नेपालको राजनीतिक खिचातानीको कारण ३० वर्षभन्दा धेरै समयसम्म आयोजना अलपत्र परेको थियो ।
अरुण तेस्रो जलविद्युत्त आयोजनाको छयाङकुटी–दिदिङ सडकखण्डको (२४.५ किलोमिटर) जग्गा सरकारले मुआब्जा वितरण गरेको भन्दा बढी जग्गा लगेको भन्र्दै स्थानीय जग्गाधनीहरू आन्दोलित भएका थिए ।
अरुण तेस्रोका प्रभावित जग्गाधनीहरूलाई सरकारले ०४६/०४७ सालमा अति सस्तो मूल्यमा १५ मिटर जग्गाको मुआब्जा वितरण गरिएको तर जग्गाधनीको ३० मिटर जग्गा बाटोले अधिग्रहण गरेको सन्दर्भमा २०७३ सालदेखि जग्गाधनीहरू सडक आन्दोलनदेखि सर्वाेच्च अदालतसम्म पुगेका थिए ।
सर्वोच्च अदालतले सरकारलाई पूर्णपाठ सार्वजनिक गर्दै पुस १७ गते पीडित जग्गाधनीहरूलाई एक महिनाभित्र छुट जग्गाको समेत मुआब्जा वितरण गर्नु भन्ने आदेश दिएको थियो ।
छुट मुआब्जाको रकम वितरण गर्नु भन्ने सरकारबाट आदेश प्राप्त भएकाले माघ १२ गतेदेखि निवेदन संकलन गरि पहिलो चरणमा पीडितको खातामा रकम जम्मा गर्ने काम सुरु गरिएको प्रमुख जिल्ला अधिकारी खड्काले जानकारी दिनुभयो ।
प्रकाशित मिति: आइतबार, फागुन ४, २०८१, १०:५२
