काठमाडौँ । दीर्घ रोग लागेका बिरामीहरूका लागि जीवनको अन्तिम समयसम्म पनि गरिने हेरचाह र स्याहारसुसार प्रभावकारी बनाउने बारेमा काठमाडौँमा अन्तिराष्ट्रिय सम्मेलन सुरु भएको छ ।
सम्मेलनमा क्यानसर, एचआईभी एड्सलगायतका दीर्घ रोगबाट प्रभावित ज्येष्ठ नागरिक तथा अरु उमेर समूहका व्यक्तिका लागि गरिने स्याहार अर्थात प्रशामक सेवाका लागि नेपाल र अन्तराष्ट्रियस्तरमा गरिएका अभ्यासको समीक्षा तथा नेपाल सरकारले आगामी दिनमा चाल्नुपर्ने कदमका बारेमा सरोकारवाला निकाय र विज्ञका बीचमा छलफल हुँदैछ ।
‘कोही पछि नपरोस्’ भन्ने नारासहित आईएनएफ नेपालको आयोजनामा हिजोदेखि सुरु भएको ग्रामीण नेपालको प्रशामक हेरचाह विषयक अन्तर्राष्ट्रिय सम्मेलनमा आज स्वास्थ्य तथा जनसङ्ख्या मन्त्री प्रदीप पौडेल, मन्त्रालय मातहका विभागका प्रमुख, विश्व स्वास्थ्य सङ्गठनका पदाधिकारीलगायतको सहभागिता रहने आईएनएफ नेपालका स्वास्थ्य तथा अस्पताल परियोजना व्यवस्थापक विष्णु गिरीले जानकारी दिनुभयो ।
उहाँका अनुसार आईएनएफले ‘सुनिना परियोजना’ मार्फन लम्जुङ, सुर्खेत र रुकुम पश्चिममा तीन वर्षसम्म गरेको प्रशामक सेवाको असल अभ्यास, अनुसन्धानको नतिजाका बारेमा पनि दुई दिने सम्मेलनमा छलफल गरिनेछ ।
सम्मेलन भौतिक र भर्चुअल दुवै स्वरूपमा चलिरहेको छ ।
यो सम्मेलनले ग्रामीण नेपालमा प्राथमिक प्रशामक हेरचाहको विकास, यसको चुनौतीहरू र उपलब्धिहरूलाई उजागर गर्नुका साथै सुनिता परियोजनाको सिकाइ र सफलतालाई उत्सवको रूपमा मनाउने उद्देश्य राखेको व्यवस्थापक गिरीले बताउनुभयो ।
प्रकाशित मिति: बुधबार, फागुन ७, २०८१, ०८:०५
