डडेलधुरा । गृहमन्त्री रमेश लेखकले भूकम्पबाट प्रभावितहरूको स्थायी आवास पुनर्निर्माणका लागि आवश्यक रकमको कुनै कमी नहुने बताउनु भएको छ ।
डडेल्धुरा जिल्लामा भूकम्प प्रभावित नागरिकहरूको निजी आवास पुनर्निर्माणको पहिलो किस्ता रकम हस्तान्तरण गर्दै गृहमन्त्री लेखकले पुनर्निर्माण कार्यका लागि आवश्यक बजेट व्यवस्थापन गरिएको बताउनुभयो ।
गएराति अबेर डडेल्धुरा पुग्नु भएका मन्त्री लेखकले डोटी भूकम्पबाट प्रभावित अमरगढी नगरपालिका–३ का लाभग्राही प्रकाश राज उप्रेतीलाई पहिलो किस्ता वाफतको रकम हस्तान्तरण गर्नुभयो ।
गृहमन्त्री लेखकले भूकम्प प्रभावित स्थायी आवास निर्माण कार्यमा स्थानीय प्रशासन र स्थानिय तहको सहयोगको आवश्यकता औंल्याउँदै स्थानीय सरकारको भूमिका पुनर्निर्माण कार्यमा अत्यन्त महत्वपूर्ण रहनेछ भन्नुभयो ।
आज बझाङ पुगेर भूकम्पबाट प्रभावित पुनर्निर्माणको काम सुरु भएको घोषणा गर्ने र प्राधिकरणको कार्यालय उद्घाटन गर्ने कार्यक्रम रहेको उहाँले बताउनु भयो ।
अछाम र जाजरकोटमा पनि प्राधिकरणको आयोजना कार्यान्वयन इकाइ कार्यालय खोल्न लागिएको उहाँले जानकारी दिनुभयो ।
प्रकाशित मिति: शुक्रबार, फागुन २३, २०८१
