ताप्लेजुङ । २०८० साल असार २ गते आएको बाढीले ताप्लेजुङको मैवाखोला गाउँपालिका साँघुको बस्तीका कतिपयको घर भत्किए त कतिको खेतीयोग्य जमिन नै मासियो ।
उनीहरूलाई पुनर्स्थापनाको बारेमा पहल नहुँदा अन्यौल बढेको छ । ५६ वर्षीय कार्साङ लामा हिजोआज गाउँको अन्य मानिसकोमा ज्यालामा काम गर्न बाध्य हुनुहुन्छ ।
आफुसँग भएको घर जग्गा पहिरोले सखाप पारेपछि कमाई खाने ठाउँ नै नभएको उहाँको भनाइ छ ।
६५ परिवार रहेको बस्तीका १ सय ९२ महिला सहित ३ सय ६६ जनालाई आवासका लागि गाउँपालिकाले श्रमदानमार्फत मदन भण्डारी रंगशालामा अस्थायी टहरा निर्माण गरि दियो ।
करिब १७ महिनादेखि पीडित परिवार टहरामा बस्न बाध्य छन् । अहिले अरुको जग्गामा भएको सागपात, दाउरा, घाँस किनेर दैनिकी चलाउनुपर्ने बाध्यता रहेको पाल्मु शेर्पाको भनाइ छ ।
गाउँपालिकाले स्थायी एकिकृत बस्ती निर्माणका लागि गत वर्षदेखि नै प्रक्रिया सुरु गरेको छ । पालिकाले कहिले स्थायी रुपमा आवासका व्यवस्था गरिदिएला र बसौँला भन्ने आशामा पीडित परिवार छन् ।
जग्गा खरिदकै लागि पालिकाले चालु आर्थिक वर्षमा ६० लाख रुपैयाँ रकम विनियोजन गरेको छ ।
राष्ट्रिय विपद् जोखिम न्यूनिकरण व्यवस्थापन प्राधिकरणको झन्झटिलो प्रक्रिया र सरकार फेरबदलका कारण स्थायी आवासका लागि ढिलाइ भएको पालिका अध्यक्ष विजय प्रकाश बनेमको भनाइ छ ।
साँघुका बाढी प्रभावित सबै परिवार अटाउने संरचना बनाउनका लागि आवश्यक पर्ने जग्गाको दाम १ करोड ९० लाख रुपैयाँ छ ।
स्थानीय सरकारले अघि सारेका योजना अनुसार प्रदेश तथा संघिय सरकारले सहयोग र समन्वय गरेनन् भने बाढी प्रभावितको बसाइ कति समय अन्योल र सकसपूर्ण हुन्छ भन्ने यसै भन्न सकिने अवस्था छैन ।
प्रकाशित मिति: शुक्रबार, फागुन २३, २०८१
