काठमाडौँ । पूर्व राजा ज्ञानेन्द्र शाह पोखराबाट फर्कँदा आज काठमाडौँको सवारी आवागमन करिब ४ घण्टा अस्तव्यस्त बनेको छ ।
त्रिभुवन अन्तरराष्ट्रिय विमानस्थलबाट बाहिरिने क्रममा राष्ट्रिय प्रजातन्त्र पार्टी (राप्रपा) लगायत राजनीतिक दल र विभिन्न सङ्गठनले निर्मल निवाससम्मै स्वागत गरेका थिए ।
राप्रपासहित पूर्व राजा समर्थित विभिन्न समूहको आह्वानमा भएको स्वागत कार्यक्रमबाट विमानस्थल–चक्रपथ क्षेत्रको यातायात प्रभावित भएको थियो ।
पूर्व राजा ज्ञानेन्द्र काठमाडौँ फर्कँदा गरिएको स्वागतलाई राजसंस्था समर्थकले प्रतिष्ठाको विषय बनाएका छन् भने सरकारमा रहेका र नरहेका केही राजनीतिक दलले असन्तुष्टि जनाएका छन् ।
काँग्रेस, एमाले, माओवादी केन्द्रलगायत दलले राजसंस्था फर्किने सम्भावना नरहेकाले उत्साहित नहुन चेतावनी दिँदै आएका छन् ।
प्रकाशित मिति: आइतबार, फागुन २५, २०८१
