काठमाडौं । वीर अस्पतालमा दुई सिफ्टमा अपरेशन सेवा सुरु भएको छ ।
बिरामीको बढिरहेको चापअनुसार सेवा दिन भन्दै अस्पतालले नाक, कान, घाँटी, दन्त, युरोलोजी तथा सामान्य अपरेशन सेवा दुई सिफ्टमा सुरु गरेको निमित्त निर्देशक डा समाज गौतमले जानकारी दिनुभयो ।
उहाँका अनुसार धेरै बिरामीलाई सुविधा दिने हिसाबले अहिले केही सेवाहरुमा दुवै सिफ्टमा अपरेशन आरम्भ गरिएको छ ।
यसअघि अस्पतालमा एक सिफ्टमा मात्र अपरेशन भइरहेको थियो ।
स्वास्थ्य तथा जनसङ्ख्या मन्त्री प्रदीप पौडेलले सबै सङ्घीय अस्पताललाई दुवै सिफ्टमा ओपीडी सेवा आरम्भ गर्न यसअघि निर्देशन दिनुभएको थियो ।
वीर अस्पतालले ओपीडी र सार्वजनिक बिदामा सेवा दिंदै आए पनि दुवै सिफ्टमा अपरेशन सुरु गरेको हो ।
आन्तरिक जनशक्ति र स्रोतबाटै व्यवस्थापन गरेर सेवा आरम्भ गरिएको निमित्त निर्देशक गौतमले बताउनुभयो ।
प्रकाशित मिति: सोमबार, फागुन २६, २०८१
