सल्यान । सल्यानको त्रिवेणी गाउँपालिका वडा नम्बर ३ ढुङ्गीबजारमा अवैध रूपमा चलेका क्रसर उद्योगले स्थानीयलाई सास्ती हुने गरेको र पर्यावरणमा क्षति पुगेको भन्दै स्थानीय राजनीतिक दलहरूले बन्द गराउन माग गरेका छन् ।
मापदण्ड विपरीत सञ्चालन भएका क्रसर उद्योगले ध्वनि प्रदुषण, जल प्रदुषण, वायु प्रदुषण गर्नुका साथै जथाभावी रुपमा शारदा नदीबाट गिट्टी, बालुवा निकाल्दा सिँचाइ कुलो र पर्यावरणमा क्षति पुगेकोले तत्काल उत्खनन रोक्न उनीहरूले माग गरेका हुन् ।
राजनीतिक दलहरूले जिल्ला प्रशासन कार्यालय, जिल्ला समन्वय समिति, डिभिजन वन कार्यालय, जिल्ला प्रहरी कार्यालय, त्रिवेणी गाउँपालिका र वडा नम्बर ३ को कार्यलय सल्यानमा ज्ञापनपत्र बुझाएका हुन् ।
बालुवा वासिङ कम्पनीको रूपमा दर्ता भएर ‘बगेश्वरी एग्री ग्रेट प्रालि’ ले राजनीतिक संरक्षणमा उक्त स्थानमा क्रसर उद्योग नै चलाएको र नदिमा डोजर स्काभेटेर प्रयोग गरेर मनपरी दोहन गर्ने गरेको उनीहरूको आरोप छ ।
क्रसर उद्योगबाट ५० मिटरको दुरीमा माध्यामिक विद्यालय, बजार र सय मिटरको दुरीमा बर्थिङ सेन्टर, स्वास्थ्य चौकी, लुहाम सुर्खेत रोड र दुई वटा सामुदायिक वन रहेको र मापदण्ड विपरीत बालुवागिट्टी उत्खनन गर्दा नदिको सतह घटी सिँचाइ कुलोहरूमा समस्या भएको स्थानीय दलका नेताहरूको भनाइ छ ।
ज्ञापनपत्र बुझ्दै प्रमुख जिल्ला अधिकारी सावित्रा पुनले खोला नदीको जिम्मा स्थानीय सरकारलाई दिइएको र अनुगमनको जिम्मा जिल्ला समन्वय समितिलाई भएको हँुदा उनीहरूसँग समन्वय गरेर अनुगमन गर्ने बताउनुभयो ।
जिल्ला समन्वय समिति उपप्रमुख असबिर बुढाथोकीले उक्त उद्योगको उजुरी पहिला पनि आएको र मापदण्ड विपरीत सञ्चालन भएकाले समन्वय प्रमुख आएपछि छलफल गरेर पुनः अनुगमन र निर्देशन गर्ने बताउनुभयो ।
ज्ञापनपत्र बुझ्दै डिभिजन वन कार्यालय सल्यानका निमित्त कार्यालय प्रमुख तथा वन अधिकृत अन्जना शर्माले उक्त उद्योग विरुद्ध विगतमा पनि पटकपटक उजुरी आएको, कार्यालयबाट पनि अनुगमन भएको र उद्योग कसैले पनि मापदण्ड अनुसार छ भन्न नसक्ने बताउनुभयो ।
ज्ञापनपत्र बुझ्दै जिल्ला प्रहरी कार्यालय सल्यानका प्रमुख केशर कुमार न्यौपानेले उक्त उद्योग विरुद्धको उजुरी गृह मन्त्रालयसम्म पुगेको तर कुनै निर्देशन नआएकोले बन्द गराउन समस्या भए पनि जथाभावी नदि दोहन नियन्त्रण गर्ने काम प्रहरीको भएकाले सोही अनुसार स्थानीय प्रहरी निर्देशन दिएको बताउनुभयो ।
प्रकाशित मिति: बिहीबार, फागुन २९, २०८१
