सल्यान । सल्यानको त्रिवेणी गाउँपालिका–१ काभ्रा रामबजार र वडा नम्बर–२ शङ्खपिपल जोड्ने शारदा नदीमा मोटरेबल पुल बनेपछि आवतजावतमा सजिलो भएको छ ।
२०७९ सालमा सम्झौता भएपछि सुरु भएको मोटरेबल पुलको काम ११ महिनामा सम्पन्न भएको पूर्वाधार कार्यालय सल्यानका प्रमुख नवीन थापाले जानकारी दिनुभयो ।
उहाँका अनुसार ८४.३ मिटर लम्बाइ रहेको यो पुल २०८१ भदौ २७ गते सम्पन्न भएको हो
पुल निर्माणका जिम्मा नारायणम भगवती जेभी नेपालगञ्जले लिएको थियो । ७ करोड १ लाख ३६ हजार ४४८ रुपैयाँ लागतमा पुल निर्माण सम्पन्न भएको उहाँले बताउनुभयो ।
यसअघि नदी तर्न कठिनाइ भोग्दै आएका स्थानीयबासीले अब सजिलै यात्रा गर्न पाएका छन् । विशेषगरी कृषि उत्पादन तथा दुग्ध व्यवसाय गर्ने किसानहरूलाई समयमा नै दूग्धजन्य सामग्री बजार पुर्याउन सजिलो भएको छ ।
मोटरेबल पक्की पुलको कर्णाली प्रदेस सरकारका मुख्यमन्त्री यामलाल कँडेलको उपस्थितिमा हिजो उद्घाटन भएको पूर्वाधार विकास कार्यालय सल्यानले जनाएको छ ।
प्रकाशित मिति: मंगलबार, चैत ५, २०८१
