भक्तपुर । भक्तपुरको चाँगुनारायण नगरपालिका वडा नम्बर ५ छालिङका एकल महिला लक्षित समुदायमा आधारित ७ दिने मनोसामाजिक सहयोग कार्यक्रम सम्पन्न भएको छ ।
नगरपालिकाको वडा नम्बर ५ को आयोजनामा भएको कार्यक्रममा ५० देखि ८२ वर्षका एकल महिलाको सहभागिता रहेको थियो ।
उनीहरूलाई एकल अवस्थामा रहँदा घरपरिवारबाट भएको स्याहारको अवस्था, मनोसामाजिक रूपमा स्वस्थ हुनका लागि अपनाउनुपर्ने तरिकालगायतका बारेमा जानकारी दिइएको थियो ।
मनोसामाजिक सहयोग कार्यक्रम समापन कार्यक्रममा एकल महिलाहरूले आफूले समाजमा भोग्नुपरेका समस्या र तालिमले पारेको सकारात्मक प्रभावका बारेमा सुनाएका थिए भने यसप्रकारका कार्यक्रम आगामी दिनमा पनि ल्याउन माग गरे ।
कार्यक्रममा सहभागीलाई दोसल्ला ओढाएर सम्मान गर्दै वडा नम्बर ५ का अध्यक्ष जयन्द्र खड्का ।
"पहिलो दिनमा आउँदा अरु तालिम जस्तै सामान्य मात्रै होला भन्ने लागेको थियो । तर सहभागी भएपछि छोड्नै मन लागेन ।" कार्यक्रममा सहभागी जुठी थापाले भन्नुभयो ।
आफूहरूका मनमा लागेका कुरा भन्न पाउँदा र मनमा आउने पीरचिन्ता कम गर्नका लागि तौरतरिकाका बारेमा जानकारी पाएपछि सजिलो भएको उहाँको भनाइ थियो ।
स्थानीय कान्छी कार्कीले मनोसामाजिक सहयोग कार्यक्रमपछि आफ्नो सोचाइ, अरुप्रतिको बुझाइ र व्यवहारमा नै परिवर्तन ल्याएको अनुभव सुनाउनुभयो ।
समापन कार्यक्रममा चाँगुनारायण नगरपालिकाका कार्यपालिका सदस्य तथा महिला लक्षित कार्यक्रम संयोजक नीर्मला केसीले एकल महिलाले समाज तथा घरपरिवारमा भोग्नुपरेका समस्याको बारेमा जानकारी आइसकेपछि यसखालको कार्यक्रम चलाइएको बताउनुभयो ।
चाँगुनारायण नगरपालिकाका कार्यपालिका सदस्य तथा महिला लक्षित कार्यक्रम संयोजक नीर्मला केसी । "सुरुका दिनमा ११ बजे कार्यक्रममा आउने र तीन बजे घर फर्कने कार्यतालिका बनाएका थियौँ । तर दोस्रो दिनबाट १० बजे नै कार्यक्रममा आउने र दिउँसो ४ बजेसम्मै उहाँहरूले कार्यक्रममा सक्रिय सहभागिता जनाउनुभयो ।" केसीले भन्नुभयो ।
वडा नम्बर ५ का अध्यक्ष जयन्द्र खड्काले आगामी दिनमा पनि एकल महिला, ज्येष्ठ नागरिक लक्षित कार्यक्रमलाई निरन्तरता दिने प्रतिबद्धता जनाउनुभयो ।
आफ्नो वडामा भएका सबै एकल महिला तथा ज्येष्ठ नागरिकको बारेमा निरन्तर जानकारी लिँदै आएको बताउँदै वडा अध्यक्ष खड्काले आगामी वैशाख पहिलो हप्तामा ज्येष्ठ नागरिकका लागि अवलोकन भ्रमण तथा वनभोजको व्यवस्था गरिएको जानकारी दिनुभयो ।
कार्यक्रममा सहभागी २५ जना एकल महिला तथा ज्येष्ठ नागरिकलाई वरिष्ठ मनोविमर्शकतर्था वीपन शाहले सहजिकरण गर्नुभएको थियो ।
प्रकाशित मिति: बिहीबार, चैत १४, २०८१
