काठमाडौँ । राजसंस्था समर्थकहरुले गरेको तोडफोड र आगजनीका घटनाको बारेमा छानविन गरी दोषीलाई कारबाही गर्ने सरकारको निर्णयसँगै प्रहरीले राजावादी आन्दोलनमा लागेकाहरूलाई पक्राउ गर्न थालेको छ ।
आन्दोलनमा परी घाइते भएकाको उपचारको अवस्था बुझ्न गएका राप्रपाका नेता धवलशम्शेर राणा र रवीन्द्र मिश्र गएराति बीएनबी अस्पताल नजिकबाट पक्राउ परेका छन् ।
राजवादी आन्दोलनका संयोजक नवराज सुवेदीलाई घरमै प्रहरीको निगरानीमा राखिएको छ भने आन्दोलनका प्रवक्ता स्वागत नेपाललाई पनि प्रहरीले पक्राउ गरेको छ ।
तोडफोडलगायतका अराजकता मच्चाउने अरु नेताकार्यकर्ताको पनि खोजी भइरहेको प्रहरीले जनाएको छ ।
पक्राउ पर्नेको सङ्ख्या हालसम्म ६० भन्दा बढी पुगेको काठमाडौँ प्रहरी प्रवक्ता अपिलराज बोहोराले बताउनुभयो ।
सरकारका प्रवक्ता, सञ्चार तथा सूचना प्रविधिमन्त्री पृथ्वीसुब्बा गुरुङले सरकारी, निजी तथा सञ्चार गृहमा गरिएको हिंसात्मक घटनाप्रति निन्दा गर्दै घटनामा घाइते भएकाहरुको निःशुल्क उपचारको व्यवस्था सरकारले मिलाउने र घटनाको सत्यतथ्य छानविन गरी कारवाही प्रक्रिया अघि बढाउने निर्णय सरकारले गरेको जानकारी दिनुभयो ।
हिजो काठमाडौँको तीनकुने क्षेत्रमा भएको राजावादी आन्दोलनका क्रममा कीर्तिपुरका सविन महर्जन र राजावादीले आगजनी गरेको एक भवनमा दृश्य खिचिरहेका एभिन्युज टेलिभिजनका पत्रकार सुरेश रजकको मृत्यु भएको थियो ।
प्रकाशित मिति: शनिबार, चैत १६, २०८१
