काठमाडौँ । विभिन्न जातजातिमा निहित रैथाने परम्परागत ज्ञान, सीप, प्रविधि र कलामा आधारित पर्यावरणमैत्री स्वदेशी वस्तु उत्पादनहरुको जगेर्ना गर्ने र त्यसमार्फत ग्रामीण तथा सहरी क्षेत्रमा जोखिमपूर्ण जीवनयापन गर्न बाध्य महिला तथा पुरुषहरुको लागि दीगो तथा मर्यादित स्वरोजगारी श्रीजना गर्न इको क्राफ्टको सुरुवात गरिएको छ ।
घर उद्यम मञ्च र होमनेट नेपालको अगुवाइमा यसका साझेदारसंस्थाहरु समेतको प्रयासबाट "घरदेखि घरसम्म" भन्ने नाराका साथ घरघरमा उत्पादित त्यस्ता रैथाने पर्यावरणमैत्री उत्पादन सिधै उपभोक्ताको घरसम्म पुर्याउनका लागि इको क्राफ्टको एक समारोहकाबीच सुरुवात गरिएको हो ।
अहिलेसम्म करिब १ सय २५ जना घर उद्यमीहरु यसमा जोडिएका छन् भने आगामी २ वर्षभित्रमा ५ सय परिवार घर उद्यमीहरुका उत्पादनहरु संस्थाको थापाथली स्थित आउटलेटबाट र इकमर्श प्ल्याटफर्मबाट बिक्री गरिने यस अभियानका प्रवर्धक तथा होमनेट नेपालका कार्यकारी निर्देशक ओम थपलियाले जानकारी दिनुभयो ।
नवजात शिशुदेखि ज्येष्ठनागरिकसम्मका व्यक्तिलाई आवश्यक पर्यावरणमैत्री लुगा, कपडा, हस्तकलाका सामान एवम् हिमालको फेदिमा फलेका प्राङ्गारिक खानेकुरा पाइने उहाँको भनाइ छ ।
इकमर्श प्ल्याटफर्मको शुभारम्भ गर्दै काठमाडौँ महानगरपालिका वडा नम्बर ११ का अध्यक्ष हिराला तण्डुकारले राज्यले नै गर्नुपर्ने काम आयोजक संस्थाहरुले थालनी गरेकोमा धन्यवाद दिँदै आगामी दिनमा महानगरपालिकाले यस अभियानमा सक्दो सहयोग गर्ने प्रतिबद्धता पनि जनाउनुभयो ।
राष्टिय किसान समूह महासङ्घका अध्यक्ष पञ्चकाजी श्रेष्ठ, सामुदायिक रेडियो प्रसारक संघका व्यवस्थापक दीपक आचार्य लगायतले यो अति सान्दर्भिक अभियान सफलताका लागि आआफ्नो क्षेत्रबाट सक्दो योगदान दिने प्रतिबद्धता ब्यक्त गर्नुभयो ।
प्रकाशित मिति: सोमबार, चैत १८, २०८१
