सल्यान । सल्यानको दार्मा गाउँपालिकाले २०८४ भित्र पूर्ण सरसफाइउन्मुख गाउँपालिका घोषणा गर्ने लक्ष्य अनुरूप ऐतिहासिक उपलब्धि हासिल गरेको छ ।
दार्मा गाउँपालिकाको वडा नं. १ अन्तर्गतका ६ वटा टोल विकास संस्थाहरूलाई सल्यान जिल्लाको पहिलो पूर्ण सरसफाइउन्मुख टोल विकास संस्था घोषणा गरिएको हो ।
पूर्ण सरसफाइउन्मुख घोषणा गरिएका टोल विकास संस्थाहरूमा मैदान टोल विकास संस्था, रावलटाकुरा भोपाल्न टोल विकास संस्था, खारा बोरबोले टोल विकास संस्था, किमुटाकुरा टोल विकास संस्था, स्यालागाउँ टोल विकास संस्था र डाँडास्यालागाउँ टोल विकास संस्था रहेका छन् ।
सम्पूर्ण टोल विकास संस्थाका सदस्यहरूले पूर्ण सरसफाइयुक्त जीवनशैली अपनाउने प्रतिबद्धता व्यक्त गर्दै आगामी दिनमा सरसफाइ सम्बन्धी विभिन्न क्रियाकलापहरूमा सक्रिय सहभागिता जनाउने घोषणा गरेका छन् ।
गाउँपालिका, वडा कार्यालय, टोल विकास संस्था, महिला स्वास्थ्य स्वयंसेविका तथा स्थानीय बासिन्दाहरूको महत्वपूर्ण योगदानका कारण यो अभियान सफल हुन सकेको गाउँपालिकाले जनाएको छ ।
प्रकाशित मिति: सोमबार, चैत १८, २०८१
