रेडियो सान्नी त्रिवेणी, कालिकोट
कालिकोटको सान्नी त्रिवेणी गाउँपालिका ३ लुयाँटामा प्रसूति गृह निर्माण भएको छ ।
नेपाल रेडक्रस सोसाईटी र सान्नी त्रिवेणी गाउँपालिकाको संयुक्त लगानिमा प्रसूति गृह निर्माण गरिएको गाउँपालिका अध्यक्ष मोहन बहादुर केसीले जानकारी दिनुभयो ।
उहाँका अनुसार उक्त प्रसूति गृहको एक कार्यक्रमका बीच उद्घाटन गरिएको छ । अब प्रतेक गर्भवती महिलाहरुले प्रसूति गृहमा आएर बच्चा जन्माउन गाउँपालिका अध्यक्ष केसीले आग्रह गर्नुभयो ।
पालिकाको वडा नम्बर ३ का महिला प्रसूति सेवा लिनका लागि घण्टौ पैदल हिँडेर वडा नम्बर ५ मा रहेको स्वास्थ्यचौकी मेहलमुडी आउनुपर्ने बाध्यता यसअघि थियो ।
प्रसूति सेवा लिनका लागि टाढा जानु पर्ने बाध्यताले कतिपयले घरमै बच्चा जन्माउने गरेका थिए । गाउँमै प्रसूति गृह निर्माण भएपछि धेरै महिलाहरुको ज्यान जोगिने र सजिलै प्रसूति सेवा लिन सकिने स्वास्थ्य शाखा संयोजक शुदर्शन बमले बताउनुभयो ।
नेपाल रेडक्रस सोसाईटीको ३३ लाख १० हजार २ सय ५३ रुपैयाँ, गाउँपालिकाको १५ लाख र समुदायको ६७ हजार १ सय ५४ रुपैयाँ लागतमा प्रसूति गृह, शौचालय र खानेपानीको धारा बनाइएको हो ।
प्रकाशित मिति: मंगलबार, चैत १९, २०८१
