काठमाडौँ । स्वास्थ्य बीमा बोर्डले १६ अर्ब ४५ करोड रुपैयाँ भुक्तानी गर्न बाँकी रहेको जनाएको छ ।
बोर्डका कार्यकारी निर्देशक डा. रघुराज काफ्लेले पत्रकार सम्मेलनमार्फत फागुन मसान्तसम्म बीमा लागु भएका अस्पतालहरूमा १६ अर्ब ४५ करोड रकम भुक्तानी गर्न बाँकी रहेको जानकारी गराउनुभयो ।
काफ्लेले जनशक्ति र पर्याप्त बजेटको अभावमा असार मसान्तसम्म २४ अर्ब रुपैयाँ भुक्तानी गर्न बाँकी रहने अनुमान गरिएको समेत बताउनुभयो ।
बोर्डमा हाल मात्र १ अर्ब रकम बाँकी रहेको उहाँको भनाइ छ । करिब २ अर्ब रकम सेवा प्रदायकलाई तिर्नुपर्ने हुन्छ, जबकि आम्दानीभन्दा खर्च १५ गुणा बढी रहेको काफ्लेले बताउनुभयो ।
स्वास्थ्य बीमा बोर्डले आर्थिक समस्याको समाधानका लागि अर्थ मन्त्रालयसँग १ सय ९२ जना कर्मचारी राख्ने प्रस्ताव अघि सारेको छ ।
दरबन्दी कम भएको कारण समयमा भुक्तानी गर्न नसकेको कार्यकारी निर्देशक काफ्लेले बताउनुभयो ।
स्वास्थ्य बीमा कार्यक्रम २०७२ सालको चैत्र महिनामा लागु भएको थियो ।
यस कार्यक्रममा ८९ लाख ५२ हजार १३५ जनाले सदस्यता लिएका छन्, तर त्यसमध्ये ५७ लाख ५३ हजार ८ सय १७ जना मात्र फागुन मसान्तसम्म नवीकरण गरेका छन् ।
बोर्डका अध्यक्ष चन्द्रबहादुर थापा क्षेत्रीकाअनुसार ५४ प्रतिशत व्यक्तिले नवीकरण नगरेका कारण बिमा कार्यक्रमको प्रभावकारिता घटेको देखिएको छ ।
देशभरका ४ सय ४ सरकारी अस्पताल, ४८ निजी अस्पताल र ३३ सामुदायिक स्वास्थ्य संस्थाले स्वास्थ्य बिमा सेवा प्रदान गर्दै आएका छन् ।
प्रकाशित मिति: आइतबार, चैत २४, २०८१
