काठमाडौँ । बारपाक केन्द्रविन्दु भएर विनाशकारी ‘गोरखा भूकम्प’ गएको आज १० वर्ष पूरा भएको छ ।
यस अवसरमा सरकारी तथा गैरसरकारी निकायको आयोजनामा आज सन्देशमूलक विभिन्न कार्यक्रम गरिँदैछ ।
२०७२ वैशाख १२ गते बिहान ११ः५६ बजे गोरखाको बारपाकलाई केन्द्रविन्दु बनाएर ७.६ म्याग्निच्युडको भूकम्प गएको थियो ।
उक्त भूकम्पमा आठ हजार ९ सय ७० जनाको मृत्यु भएको थियो भने निजी र सरकारी गरी साढे आठ लाख भौतिक संरचनामा क्षति पुगेको थियो ।
यसैबीच नेपाल भूकम्पिय जोखिममा रहेकाले भूकम्पअघि र पछि गर्नुपर्ने कामबारे तयारीमा ढिलाई गर्न नहुनेमा विज्ञले जोड दिएका छन् ।
नेपाल सधैँ भूकम्पिय जोखिममा रहेको र त्यसमा पनि पश्चिम नेपालमा ठूलो भूकम्प गएको ५ सयभन्दा धेरै वर्ष भइसकेकाले आवश्यक पूर्वतयारी अहिले नै गर्नुपर्ने उनीहरूको सुझाव छ ।
ठूलो भूकम्प कहिले र कहाँ जान्छ भनेर यकिन गर्न सकिने यन्त्र अहिलेसम्म कतै पनि नबनेकाले पूर्व सतर्कता नै महत्वपूर्ण रहेको वरिष्ठ भूकम्पविद् डा. लोकविजय अधिकारीले सीआईएनसँग बताउनुभयो ।
भूकम्पको पूर्वानुमान गर्न नसकिने भएकाले कसरी जोगिने भन्ने बारेमा विद्यालयस्तरमा सिकाउन आवश्यक रहेको उहाँको भनाइ छ ।
प्रकाशित मिति: शुक्रबार, वैशाख १२, २०८२
