रेडियो बाजुरा, बाजुरा ।
गौमुल–६ सटेडाका गोरे मिजारको उमेर ५० वर्ष पुग्यो । उहाँले जाँड रक्सी खान छोडेको ६ महिना भयो । त्यसअघि रक्सी खानकै लागि मिजारले श्रीमतिका गहना देखि जग्गा समेत बेच्नु परेको थियो ।
गौमुल गाउँपालिकाले मदिरा सेवनका लागि कार्ड अनिवार्य गरेपछि मिजारको बानी मात्रै सुध्रिएन, घर परिवारसँगको सम्बन्ध पनि राम्रो भयो ।
मिजारले भन्नुभयो, ‘कसैको जोइ पनि हराए, कसैको आमाबुवासँग सम्बन्ध नराम्रो भयो । अहिले नयाँ नियम आएर साह्रै राम्रो भएको छ ।’
गाउँपालिकाले मदिरा सेवनकर्ताको हकमा अनिवार्य कार्ड बनाउनु पर्ने र खाँदा साथमा बोक्नु पर्ने प्रावधान ल्याएको छ ।
गाउँपालिकाले यस्तो नीति ल्याएपछि सुरुमा धेरैले मदिरा कार्ड बनाए । तर कार्ड घाँटीमा झुन्डाएर हिड्दा मानिसहरुले जँड्याहा भन्न थालेपछि जाँडरक्सी खान छोड्नेहरु बढेका छन् ।
गौमुल १ का रामबहादुर रोकाया गाउँपालिकाले यो कानुन ल्याएपछि स्वास्थ्य सँगै आर्थिक रुपमा पनि सकारात्मक परिवर्तन आएको बताउनुहुन्छ ।
गौमुल गाउँपालिकाले मदिरा कार्ड विना मदिरा सेवन गर्नेलाई १५ हजार जरिवाना लिने गरेको छ । ५ सय तिरेर कार्ड लिनु पर्ने र प्रत्येक वर्ष नविकरण गर्नु पर्ने प्रावधान पनि राखेको छ ।
गाउँपालिकाको यस्तो नीतिले मदिरा सेवन गर्नेहरु घटेको बताउनुहुन्छ, गौमुल २ का भरत धामी ।
गाउँपालिकाले मदिरा सेवन गर्नेहरुको सूची राख्न थालेपछि धेरै जसो कर्मचारी र शिक्षकले मदिरा सेवन गर्न छाडेका छन् ।
पहिलो वर्ष १ हजार ३ सय ५४ जनाले मदिरा सेवन कार्ड बनाएका थिए । तर यो वर्ष भदौ १६ गतेसम्म ३ सय ७७ जनाले मात्रै नविकरण गरेका गाउँपालिकाका प्रशासन सहायक गणेश रोकायाले बताउनुभयो ।
बाजुराको गौमुल गाउँपालिकाले थालेको मदिरा व्यवस्थापनको काम प्रभावकारी बनेको छ । गाउँपालिकाले मदिरा सेवनका लागि कार्ड अनिवार्य गरेपछि, मदिरा विक्रि वितरण र सेवन गर्नेहरु उल्लेख्य मात्रामा घटेका हुन् ।
अघिल्लो वर्ष मदिरा कार्ड लिनेमा शिक्षक र कर्मचारी बढि थिए, यो वर्ष उनीहरु कसैले पनि नविकरण गरेका छैनन् । पछिल्लो एक वर्ष यता महिला हिंसा, गाली बेइज्जती र आपसी विवादका घटनामा कमी आएको स्थानीयले बताएका छन् ।
अडियो सुन्नुहोस् :
प्रकाशित मिति: बिहीबार, भदौ १९, २०७६
