ओखलढुङ्गा । ओखलढुङ्गाको दुर्गम गाउँ चम्पादेवी गाउँपालिकाको रानीवनमा एक्सरे सेवा सुरु भएको छ । चम्पादेवी गाउँपालिका १० स्थित रानीवन प्राथमिक स्वास्थ्य केन्द्रमा आजबाट एक्सरे सेवा सञ्चालनमा आएको हो ।
गाउँपालिका र वडाको लगानीमा तालिम प्राप्त जनशक्ति तयार गरी एक्सरे मेसिनका लागि आवश्यक अन्य उपकरण, एक्सरे कोठा तथा कच्चापदार्थको व्यवस्था गरेसँगै एक्सरे मेसीन प्रयोगमा आएको चम्पादेवी गाउँपालिका १० रानीवनका अध्यक्ष उज्जव बुढाथोकीले बताउनुभयो ।
गाउँपालिका र वडा कार्यालयको लगानीमा आवश्यक उपकरण, भवन तथा कच्चापदार्थसँगै तालिम प्राप्त जनशक्तिको व्यवस्था गरेर सेवा सुरु गरिएको हो । एक्सरे सेवाबाट चम्पादेवी र लिखु गाउँपालिका पूरै नागरिकले सहज सेवा पाउने वडा अध्यक्ष बुढाथोकीको भनाइ छ ।
एक्सरे सेवा सुरु भएपछि गाउँमा भएका सानातिना दुर्घटनाबाट घाइते भएका विरामीहरूले जिल्ला सदरमुकाम र रामेछापको मन्थलीसम्म जानुपर्ने बाध्यता टरेको छ ।
एक्सरे मेसिन दक्ष जनशक्ति र आवश्यक, औजार, लगानी तथा भवन अभावमा सुरु हुन सकेको थिएन । एक्सरे सञ्चालनमा आएसँगै हड्डीसँग सम्बन्धित पुराना १२ जनाभन्दा धेरै बिरामीले आजै सेवा लिएका प्रथमिक स्वास्थ्य केन्द्र रानीवनले जनाएको छ ।
नागरिकको स्वास्थ्य सेवालाई प्रथमिकता दिने उद्देश्यले गाउँपालिका तथा वडाले एक्सरे मेसीन सञ्चालनमा लगानी गरिएको चम्पादेवी गाउपालिका प्रमुख नवराज केसीले बताउनुभयो ।
एक्सरे मेसिन सञ्चालनका लागि गाउँपालिकाको स्वास्थ्य शाखा अन्तर्गत प्राथमिक स्वास्थ्य केन्द्र सुदृढिकरण शिर्षकमा आएको केही बजेट, गाउपालिका तथा वडाको गरी ८ लाख खर्च भएको वडा अध्यक्ष बुढाथोकीले जानकारी दिनुभयो ।
एक्सरे मेसिन स्वास्थ्य मन्त्री गगनकुमार थापाको पालामा स्वस्थ्य मन्त्रालय स्वास्थ्य सेवा विभागले वितरण गर्दा रानीवन प्राथमिक स्वास्थ्य केन्द्रलाई पनि उपलब्ध गराएको थियो ।
एक्सरे मेसिन दक्ष जनशक्ति र आवश्यक, औजार, लगानी तथा भवन अभावमा सुरु हुन सकेको थिएन । एक्सरे सञ्चालनमा आएसँगै हड्डीसँग सम्बन्धित पुराना १२ जनाभन्दा धेरै बिरामीले आजै सेवा लिएका प्रथमिक स्वास्थ्य केन्द्र रानीवनले जनाएको छ ।
प्रकाशित मिति: शुक्रबार, कात्तिक १, २०७६
