गुल्मी ।
माल भएर पनि चाल नपाएपछि सामानको पनि अर्थ हुन्न । उपयोग राम्रोसँग भएन वा गरिएन भने नयाँ सामान केहीसमयमा नै थोत्रो बन्छ । गुल्मीमा सरकारी गाडीको अवस्था यस्तै छ ।
समन्वय समतिमा मात्रै ६ करोडका बिग्रेका गाडी
जिल्ला समन्वय समितिको परिसरमा पाचँवटा गाडी बिग्रिएको अवस्थामा छ । एउटा मोटरसाईकल, अन्य चारवटा ल्यान्डरोभर कम्पनीका गाडी छन् । तिमध्ये एउटा बनाए बन्ने अवस्थामा छ । तर बनाइएको छैन् ।
बा १ झ ६६० नम्बर र बा १ झ ६६८१ नम्बरको ल्यान्डरोभर गाडी २०६० असोज १० गते तत्कालिन जिल्ला विकास समितिलाई हस्तान्तरण भएको देखिन्छ । खरिद मिति भने जिन्सी किताबमा उल्लेख छैन ।
बा १ झ ६६० नम्बरको गाडी बनाए बन्ने अवस्थामा छ तर बनाइएको छैन । बा १ झ ६६८१ नम्बरको गाडी विग्रिएको सात बर्ष भयो ।
दुवै गाडीको खरिद मुल्य तत्कालिन समयमा ४०/४० लाख उल्लेख गरिएको छ । त्यतिखेर ४० लाखमा किनिएका ती गाडीको मूल्य अहिले डेढ करोड पर्छ । करिब डेढ करोड पर्ने अर्काे कालो रङको गाडीको नम्मर प्लेट नै छैन ।
जिल्ला समन्वय समितिकै परिसरमा अर्को कुनामा अर्को ल्यान्डरोभर कम्पनीकै गाडी विग्रीएको अवस्थामा छ र उक्त गाडी पनि कति समयदेखि त्यहाँ छ भन्ने कुनै अभिलेख छैन ।
जिससमै एउटा मोटरसाईकल बिग्रीएको अवस्थामा छ । कार्यालयको कुनामा भएकोले बिग्रिएको मोटरसाइकल सजिलै देखिंदैन पनि ।
समन्वय समितिले गाडीको उचित व्यवस्थापन गर्न सकेको छैन । एकबर्ष बसेर, गएको हप्ता सरुवा हुनुभएका जिल्ला समन्वय अधिकारी प्रलाद पोखरेलका अनुसार करोडौंका गाडी बनाउन मिल्छ । तर बनाउने केही हजार वा लाख बजेट छैन ।
उहाँले भन्नुभयो, ‘हाम्रो अहिलको तत्कालिन बजेटले गर्दा धान्न सक्ने अवस्था छैन । यसलाई कसरी प्रयोगमा ल्याउने भनेर हामी छलफलमा छौं । यदि मन्त्रालयबाट निकासा आयो भने हामी यसलाई तुरुन्त मर्मतमा दिने सोचाइमा छौं ।’
टेलिकममा डोजरको भग्नावशेष
जिल्ला दुरसञ्चार कार्यालय, नेपाल टेलिकमको भवनअगाडी एउटा डोजरको भग्नावशेष छ । दुरसञ्चार कार्यालय स्थापना भएको १२ वर्ष भयो । त्यहि समयदेखि नै डोजर त्यही अवस्थामा एउटै ठाउँमा छ । न लिलाम गरिएको छ न व्यवस्थापन भएको छ ।
हालसम्म पनि कुनै कम्पनी वा व्यक्तिले डोजरको दाबी गर्न आएका छैनन् । तर तत्कालिन समयमा सडक विभागले खरिद गरेको हुनसक्ने अनुमान गरिएको कार्यालय प्रमुख रुकमागत सापकोटाले जानकारी दिनुभयो ।
‘कार्यालय स्थापना हुँदा नै यस्तै अवस्थामा थियो रे, अहिले पनि यस्तै छ ।’ सापकोटाले भन्नुभयो, ‘हटाउनका लागि धेरै निकायमा पहल गरें तर कुनै उपाय लागेन ।’
उक्त डोजरको मुल्य एक करोड पर्ने एकजना डोजर चालक मेघराज नेपालीले बताउनुभयो ।
एम्बुलेन्स बिहिन अस्पताल : बिग्रेका बन्दैनन्, नयाँ किन्दैनन्
जिल्लास्तरको सरकारी अस्पतालमै एम्बुलेन्स छैन भन्दा अचम्म लाग्न सक्छ । तर तम्घास अस्पतालको सन्दर्भमा यो कुनै नौलो र अनौठो विषय होइन् ।
विगत सात बर्षदेखि तम्घास अस्पतालमा एम्बुलेन्स छैन । भएका दुईवटा एम्बुलेन्स मर्मत नगरेर अस्पतालको परिसरमा अलपत्र छन् ।
अस्पतालमा बिग्रेका एम्बुलेन्स बन्दैनन् । नयाँ किन्न कसैले चासो दिदैैँनन् । वर्षौंदेखि एम्बुलेन्स ग्राउण्डमा राख्दा सिटहरु बिग्रनुका साथै एम्बुलेन्सभित्रै घाँस उम्रिएको छ ।
एउटा मारुति सुजुकी कम्पनीको लु १ झ २७९ नम्बरको एम्बुलेन्स छ । सातबर्ष पहिले सिमिचौरमा दुर्घटना भएदेखि उक्त एम्बुलेन्स अस्पतालमै थन्किएको छ ।
अर्को लु १ झ २३५ नम्बरको एम्बुलेन्स छ । दुवै एम्बुलेन्सको खरिद मिति र मुल्यबारे अस्पताल बेखबर छ । दुवै एम्बुलेन्सको हालको खरिद मुल्य ५० लाख भएपनि भन्सार छुट हुनेहुँदा २५ लाख पर्छ ।
सात बर्षसम्म न त एम्बुलेन्स नयाँ आए न मर्मत भए, किन ? अस्पतालका प्रमुख डाक्टर उत्तम पाच्याको जवाफ छ, ‘अप्ठ्यारो अवस्था छैन । किनकी निजी एम्बुलेन्सहरु गुल्मीमा धेरै छन्, र अस्पतालमा चाहेको बेलामा भेटिन्छ ।’
अस्पतालको आफ्नै एम्बुलेन्स नभएपनि अन्य संस्थाका एम्बुलेन्सहरुले सेवा दिइरहेको हुँदा बिरामीहरु मर्कामा नपरको उहाँको भनाइ छ ।
वन कार्यालयमा मोटरसाइकल
जिल्ला वन कार्यालयमा पनि सरकारी नम्बर प्लेटको मोटरसाईकल अलपत्र छ । विगत १२ बर्षदेखि कार्यालयमै रहेको मोटरसाईकलको हालको मुल्य दुईलाख २५ हजार पर्छ । उक्त मोटरसाईकलको पनि लिलाम प्रक्रिया थालनी गरिएको छैन ।
वन कार्यालयमा अलपत्र मोटरसाईकल । तस्बिर : हुमाकान्त पोखरेलजिल्लाका विभिन्न सरकारी कार्यालयहरुमा कुल सात करोड ३३ लाख बराबरका सरकारी गाडी प्रयोगविहिन छन् ।
सामान्य मर्मत गरेर चल्न सक्ने गाडी पनि अलपत्र पारिन्छ । तर, राज्यको ढुकुटीबाट खर्चेर नयाँ गाडी मगाउने गरिन्छ । यसमा जिल्ला समन्वय समिति पनि अनेक बहाना पारेर उम्किन खोजेको देखिन्छ ।
जिल्ला समन्वय समिति प्रमुख लक्ष्मण पराजुली आफूहरु आउनुभन्दा अघिदेखि नै यस्ता गाडीहरु अलपत्र रहेका देखिएको र मर्मतका लागि तीनको पाटपूर्जा सजिलै नभेटिने बताउनुहुन्छ ।
प्रशासनका कुर्सीदेखि कैंचीसम्म लिलाम
जिल्ला प्रशासन कार्यालयले भने आफ्नो मातहतमा रहेका विभिन्न सामग्रीहरु लिलाम गरेको छ ।
प्रशासनले लिलामी गर्नेसम्बन्धी सूचना जारी गरेर प्रक्रिया अगाडी बढाएको हो । उसले २० वटा घुम्ने कुर्सी, चापँका कुर्सी, फाइल क्याबिन र स्टिल दराज चार/चारवटा, आठ वटा काठको दराज, १५ वटा घर्रा टेबुल लिलामी गरेको हो ।
त्यस्तै दुईवटा पलङ, एउटा स्टिल डेक्ची, ६ वटा स्टिल गिलास, चारवटा प्रेसर कुकर, तीनवटा दिउरी, एउटा फुट काट्ने कंैची लगायतका सामग्री लिलाम गरिएको जिल्ला प्रशासन कार्यालयका सूचना अधिकारी लक्ष्मणप्रसाद पाण्डेले जानकारी दिनुभयो ।
के छ नियममा ?
आर्थिक कार्यविधि नियमावली २०६४ को परिच्छेद ७ मा लिलाम बिक्रिसम्बन्धी व्यवस्था गरिएको छ ।
जसमा काम नलाग्ने देखिएका मालसामानहरु लिलाम विक्री गर्ने, मर्मत गर्नुपर्ने दायित्व सम्बन्धित कार्यालय प्रमुखको हुने उल्लेख छ । तर गुल्मीका कुनै कार्यालय प्रमुखहरुले त्यो परिच्छेद हेरेका छैनन् ।
अडियो सुन्नुहोस् :
प्रकाशित मिति: बुधबार, कात्तिक १३, २०७६
