काठमाडौँ । नेपालमा जारी १३ औँ दक्षिण एसियाली खेलकुद प्रतियोगिता (साग) को तेस्रो दिन आज विभिन्न १५ विधाका खेल हुँदैछन् ।
काठमाडौँ र पोखरामा हुने आजको खेलमा एथलेटिक्स, ब्याडमिन्टन, क्रिकेट, साइक्लिङ, फुटबल, गल्फ, कराते, खो खो, सुटिङ, टेबलटेनिस, टेनिस, तेक्वान्दो, ट्रायथोलन, भलिबल र उसुको प्रतिस्पर्धा हुनेछ ।
ब्याडमिन्टन, महिला क्रिकेट, महिला फुटबल र ट्रायथलन पोखरामा हुनेछ भने अन्य खेल काठमाडौँमा हुनेछ । पुरुष फुटबलमा आज दुई खेल हुनेछन् । जसमा नेपालले भुटानसँग पहिलो खेल खेल्दैछ ।
नेपाल र भुटानबीचको खेल १ बजे दशरथ रङ्गशालामा हुनेछ भने अर्को खेलमा बङ्गलादेशले माल्दिभ्ससँग प्रतिस्पर्धा गर्नेछ । राउण्ड रोबिनका आधारमा हुने खेलको शीर्ष दुई टिम फाइनल प्रवेश गर्नेछन् । महिला फुटबलतर्फ पनि दुई खेल हुँदैछन् । पोखरा रङ्गशालामा जारी खेलमा नेपालले श्रीलंकाको सामना गरीरहेको छ ।
दोस्रो खेलमा भारत र माल्दिभ्सबीच प्रतिस्पर्धा हुनेछ । साग अन्तर्गत आज महिला र पुरुष दुबैतर्फको फाइनल खेल हुँदैछन् । राष्ट्रिय खेलकुद परिषद्को कभर्डहलमा दिउँसो ४ बजे हुने खेलमा महिलातर्फ स्वर्णका लागि नेपाल र भारतबीच प्रतिस्पर्धा हुनेछ ।
दिउँसो १ बजे हुने पुरुषतर्फको खेलमा भारत र पाकिस्तानबीच स्वर्णका लागि प्रतिस्पर्धा हुनेछ । क्रिकेट अन्तर्गत आज नेपालले टेष्ट राष्ट्र श्रीलंकाको २३ वर्ष मुनिको टिमसँग खेल्दै छ भने पोखरामा हुने महिला क्रिकेटमा श्रीलंका र बंगलादेशबीच प्रतिस्पर्धा हुनेछ ।
उसुका खेलहरु आजैबाछ सुरु हुँदैछन् । आर्मी क्लबको शारीरिक तथा प्रशिक्षण केन्द्रमा हुने खेल विहान ९ बजेबाट सुरु भएको छ । थाउलो तथा सान्सो विधामा एकै दिन प्रतिस्पर्धा हुनेछ ।
सुटिङका खेलहरु पनि आजबाट सुरु हुँदैछन् । तेक्वान्दोमा आज पुरुषको ५४ केजी र ६८ तथा महिलाको ४६ केजी र ५७ केजी स्पर्धामा नेपालले चुनौती पेश गर्नेछ । आज एथ्लेटिक्सतर्फ ७ वटा स्वर्णको टुङ्गो लाग्दैछ ।
काठमाडौँको दशरथ रङ्गशालामा विभिन्न ९ स्पर्धामा प्रतिस्पर्धा हुने तय भए पनि ७ खेलको मात्र स्वर्णको टुङ्गो लाग्ने भएको हो । खो खोतर्फ आज सेमिफाइनलको खेल हुनेछ । सेमिफाइनलमा भारतले श्रीलंका तथा नेपालले बंगलादेशविरुद्ध प्रतिस्पर्धा गर्ने छ ।
करातेमा आज पनि विभिन्न पदकको लागि खेल हुनेछ । पोखरामा हुने ब्याडमिन्टनतर्फका खेल हुँदैछ । टेबल टेनिस र टेनिस, ट्रायथलन, साइक्लिङ लगायतका खेल पनि आज हुने छन् ।
प्रकाशित मिति: मंगलबार, मंसिर १७, २०७६
