दैलेख । दैलेखको ठाँटीकाँध गाउँपालिकाका अध्यक्ष धीरबहादुर शाही अपहरणमा पर्नुभएको छ ।
ठाँटीकाँध गाउँपालिका वडानम्बर २ श्रीपाटामा रहेको घरबाटै अध्यक्ष शाही आईतबार राती अपहरणमा पर्नुभएको हो । उहाँलाई अज्ञात समूहले राती एक बजे अपहरण गरेर लगेको ठाँटीकाँध प्रहरी चौकीले एकजना प्रहरी अधिकृतले सीआईएनलाई जानकारी दिए ।
प्रहरीले अपहरणमा विप्लव संलग्नता रहेको आशंका गरेको छ । यद्यपी अपहरणको जिम्मा अहिलेसम्म कसैले लिएको छैन ।
अपहरित शाहीलाई कालिकोटको होङ्मा गाउँपालिका हुँदै सिमाना नाका तिर लगिएको खबर आएको प्रहरीले जनाएको छ ।
अहिले शाहीको खोजीका लागि नेपाल प्रहरी र सशस्त्र प्रहरी टोलि परिचालन गरिएको छ ।
अध्यक्ष शाहीसँगै उहाँको श्रीमति इलालाई पनि नकाबधारी समूहले लगेको थियो । तर दुई घण्टा हिंडाएपछि इलालाई अपहरणकारीहरुले जंगलबाटै फर्काएको प्रहरीले जनाएको छ ।
प्रकाशित मिति: आइतबार, पुस ६, २०७६, ११:२२
