काठमाडौं । आज राष्ट्रिय शोक मनाइदैछ । संस्कृति, पर्यटन तथा नागरिक उड्ड्यनमन्त्री रवीन्द्र अधिकारीसहित सातजनाको ज्यान जानेगरि बुधबार भएको हेलिकप्टर दुर्घटनापछि सरकारले राष्ट्रिय शोक मनाउने निर्णय गरेको छ । बुधवारको मन्त्रिपरिषद्को आकस्मिक बैठकले आज बिहीबार राष्ट्रियशोक मनाउने निर्णय गरेको हो । यसक्रममा सरकारले आजका लागि देशभर सार्वजनिक बिदा घोषणा गरेको छ ।
राष्ट्रिय शोक मनाउने क्रममा देशभरका सबै सरकारी कार्यालयमा राष्ट्रिय झण्डा आधा झुकाइने छ । यस्तै, दिवङ्गत मन्त्री अधिकारीको राजकीय सम्मानका साथ अन्तिम संस्कार गर्ने निर्णय पनि मन्त्रिपरिषद बैठकले गरेको छ ।
आजबाट छानविन
दुर्घटनाको सम्बन्धमा विस्तृत जाँचबुझ गरी सुझावसहितको प्रतिवेदन बुझाउन गठन भएको आयोगले आजबाट छानविन गर्दैछ । सरकारले यथाशीघ्र पेश गर्न गैरसैनिक हवाई उडान दुर्घटना जाँच नियमावली, २०७१ को नियम १० बमोजिम चार सदस्यीय दुर्घटना जाँच आयोगसमेत गठन गरेको छ ।
आयोगको अध्यक्षमा सरकारका पूर्वसचिव यज्ञप्रसाद गौतम छन् भने सदस्यहरुमा नेपाली सेनाका सहायक रथी दीपकप्रसाद बास्तोला, अवकाश प्राप्त महासेनानी प्रमोद लामा, संस्कृति, पर्यटन तथा नागरिक उड्डयन मन्त्रालयका सहसचिव बुद्धिसागर लामिछाने छन् ।
प्रकाशित मिति: बिहीबार, फागुन १६, २०७५, ०७:१३
