काठमाडौं ।
नयाँ कोरोना भाइरस अर्थात् कोभिड–१९ ले चीनमा महामारीकै रुप लिएको छ ।
हिजोसम्मको तथ्याङ्क हेर्ने हो भने यो रोगका कारण ७५ हजार मानिस संक्रमित भएका छन् भने दुईहजार बढीको मृत्यु भइसकेको छ ।
छिमेकी चीनमा देखिएको रोगबाट जोगिन नेपालीहरू भने सचेत हुन थालेका छन् । उनीहरूलाई डाक्टरलाई भेट्ने यसबारे जानकारी लिने समेत गरिरहेका छन् ।
शुक्रराज ट्रपिकल तथा सरुवा रोग अस्पताल टेकुमा अहिले दैनिक ६ देखि १० जनासम्म कोरोना भाइरसको आशंकामा आउने गरेका छन् । सामान्य रुघाखोकी लाग्दा वा चीनबाट फर्किएका नागरिकसँग भेटघाट गरेकाहरू पनि अस्पताल आउँछन् ।
गत डिसेम्बर महिनामा देखिएको कोरोना भाइरसका कारण नेपालमा एक जना संक्रमित भएका थिए । उनी उपचारपछि स्वस्थ भएर घर फर्किसकेका छन् । मुख्यगरि श्वासप्रश्वासको माध्यमबाट सर्ने यो रोगको संक्रमण हुन्छ की भनेर नेपालीहरू सचेत हुन थालेका छन् ।
अस्पताल आउने बिरामीमध्ये अधिकांशमा कोरोना भाइरसप्रतिको डर र त्रास देखिएको चिकित्सकहरूको भनाइ छ ।
मौसम परिवर्तनसँगै देखिने फ्लूको लक्षणजस्तै कोरोनाको पनि रुघाखोकी लाग्ने, टाउको दुख्ने र ज्वरो आउने लक्षण देखिन्छ । तर लक्षण मिल्दोजुल्दो भयो भनेर डराउने भन्दा पनि त्यसको वास्तविकतामा ध्यान दिनुपर्ने डा.शेर बहादुर पुनको सुझाव छ ।
कोरोना भाईरसप्रति मानिसमा देखिएको डर त्रासलाई कम गर्न र सचेतना फैलाउन सरकारले हरसम्भव प्रयास गरिरहेको इपिडिमियोलोजी तथा रोग नियन्त्रण महाशाखाका महानिर्देशक डा. विवेक कुमार लाल बताउनुहुन्छ ।
उहाँले भन्नुभयो, ‘राष्ट्रिय स्वास्थ्य शिक्षा, सूचना तथा सञ्चार केन्द्रमार्फत् एफएम रेडियोहरूको सञ्जालमार्फत् देशैभरी सूचना प्रशारण भइरहेको छ । त्यस्तै, सामाजिक सञ्जालहरू फेसबुक, वेबसाइटहरूमा यस सम्बन्धि सूचनाको सामग्रीहरू राखिएको छ । विभिन्न तहका स्वास्थ्यका निकायहरूबाट उहाँहरूलेचाहिँ यो सम्बन्धी जनचेतनाका सामग्रीहरू पनि तयार गर्नुभएको छ, कार्यक्रमहरू पनि अभियानकै रुपमा सञ्चालन गर्नुभएको छ । ’
बेला बेलामा देखिने यस्ता विभिन्न सरुवा रोगबाट जोगिन नागरिक आफैं पनि सचेत हुनु आवश्यक छ । हल्लाको पछि लाग्नुभन्दा पनि त्यसको वास्तविकता तिर ध्यान दिनुपर्ने र सचेत हुनुपर्ने चिकित्सकहरूको सुझाव छ ।
अडियो सुन्नुहोस् :
प्रकाशित मिति: बिहीबार, फागुन ८, २०७६
