काठमाडौं ।
युवा स्वरोजगारका लागि प्रदान गर्दै आएको सहुलियतपूर्ण ऋण हालसम्म २२ हजार युवाले लिएका सरकारले जनाएको छ ।
युवालाई देशमै स्वरोजगार बनाउन, वैदेशिक पलायन रोक्न र नेपालमै उद्यमशिलताको विकास गर्न भन्दै सरकारले अर्थ मन्त्रालय मार्फत् सहुलियतपूर्ण कर्जाका लागि ब्याज अनुदान सम्बन्धी एकीकृत कार्यविधि २०७५ जारी गरेको छ ।
कार्यविधि अनुसार हाल युवाले विभिन्न ९ प्रकारका सहुलियतपूर्ण कर्जा पाउने गरेका छन् ।
प्रत्येक कर्जामा ५ प्रतिशत ब्याज सहुलियत र महिलाको हकमा ६ प्रतिशत ब्याज सहुलियतको व्यवस्था गरिएको छ ।
सहुलियतपूर्ण कर्जा लिएर युवाले गरेका प्रत्येक व्यवसायको राज्यले बीमा समेत गरिदिने गरेको छ । राष्ट्रिय युवा परिषद्का अनुसार बीमाको ७५ प्रतिशत प्रिमियम समेत सरकारले नै तिरिदिने गरेको छ ।
२०७५ साल कार्तिका २० गतेबाट कार्यान्वयनमा आएको यो कार्यक्रम अन्तरगत हालसम्म २२ हजार भन्दा बढी युवाले सहुलियतपूर्ण कर्जा लिएका राष्ट्रिय युवा परिषद्का सूचना अधिकारी ध्रुवराज पौडेलले सीआईएनसँग बताउनुभयो ।
युवालाई सहुलियत ऋण लिन सजिलो होस् भनेर राष्ट्रिय युवा परिषद्ले सहजिकरण गरिरहेको भन्दै पौडेलले विभिन्न बैंकका प्रतिनिधि, सीईओ, अर्थ मन्त्रालय, राष्ट्र बैंक लगायत सरोकारवाला निकायसँग निरन्तर छलफल गरिरहेको जानकारी दिनुभयो ।
पौडेलका अनुसार युवालाई ऋण पाउन सहज होस् परिषद्ले उद्यमशिलता विकास र वित्तिय साक्षरता सम्बन्धि सात दिने निःशुल्क तालिम समेत दिने गरेको छ ।
तालिम लिन चाहने युवाले परिषद्मा सिधै आएर वा इमेल मार्फत् पनि नाम दर्ता गर्न सक्नेछन् ।
तोकिएको शिर्षकमध्ये कुन शिर्षकमा ऋण लिन चाहने हो, निवेदन लिएर युवा सम्बन्धित बैंकमा जान सक्नेछन् । त्यसका लागि नागरिकता, संस्था दर्ताको प्रमाणपत्र, व्यवसायीक योजना तयार गरेर बैंकमा दर्ता गर्न सकिनेछ ।
त्यसपछि बैंकले सम्बन्धित क्षेत्रको विज्ञलाई फिल्डमा पठाएर अनुगमन गर्न लगाउनेछ । अनुगमनपछि विज्ञले सिफारिस गरेमा बैंकले ऋण उपलब्ध गराउनेछ ।
प्रकाशित मिति: शनिबार, फागुन १७, २०७६, ११:२९
