काठमाडौँ । पूर्व उपप्रधान तथा अर्थ मन्त्री भरतमोहन अधिकारीको पशुपति आर्यघाटमा आज अन्त्येष्टि गरिएको छ ।
राजकीय सम्मानका साथ अधिकारीको अन्त्येष्टि गरिएको हो । तीन छोरीहरु लुना, लिना र लिजाले अधिकारीलाई दागबत्ती दिएका थिए । सशस्त्र प्रहरीको एक टुकडीले सलामी अर्पण गरेको थियो ।
स्वर्गीय अधिकारीको शवमा उपप्रधान तथा रक्षामन्त्री ईश्वर पोखरेलले राष्ट्रिय झन्डा ओढाएर सम्मान दिनु भएको थियो ।
नेकपाको नेतासमेत रहनु भएका अधिकारीको पार्थिव शरीरलाई आजै नेकपाको मुख्यालय भुमबाराहीमा श्रद्धाञ्जलीका लागि राखिएको थियो ।प्रधानमन्त्री तथा नेकपा अध्यक्ष केपी शर्मा ओली र अर्का अध्यक्ष पुष्पकमल दाहाल 'प्रचण्ड'ले सयुक्त रुपमा पार्टीको झण्डा ओढाउनु भएको थियो ।
नेता अधिकारीको ८२ वर्षको उमेरमा गएराति निधन भएको थियो ।
१९९३ साल वैशाख २२ मा जन्मनु भएका नेता अधिकारीले २०५१ सालको पहिलो कम्युनिस्ट सरकारमा अर्थमन्त्रीका रुपमा लोकप्रिय र जनप्रिय कार्यक्रम ल्याउनु भएको थियो ।
प्रकाशित मिति: आइतबार, फागुन १९, २०७५
